បុរសអាយុ ២៧ឆ្នាំម្នាក់ បានទាក់កជាមួយនឹងខ្សែខ្លែង ខណៈពេលដែលគាត់កំពុងជិះម៉ូតូនៅជិតស្ពាន Thu Thiem ក្នុងទីក្រុងហូជីមិញ កាលពីថ្ងៃចន្ទ ដែលបណ្តាលឱ្យរងរបួសដល់សរសៃពួរដៃ និងកធ្ងន់ធ្ងរ។ ជនរងគ្រោះមានឈ្មោះ Nguyen Van Luy កំពុងត្រូវបានតាមដានដោយវេជ្ជបណ្ឌិតនៅមន្ទីរពេទ្យ Le Van Thinh ក្នុងក្រុង Thu Duc បន្ទាប់ពីទទួលបានការវះកាត់រួចរាល់។ ក្រុមគ្រួសារអ្នកជំងឺបាននិយាយថា កាលពីថ្ងៃច័ន្ទ នាវេលាម៉ោងប្រហែល ៤ និង ៣០ នាទីល្ងាច ជនរងគ្រោះបានជិះម៉ូតូទៅជិតស្ពាន Thu Thiem ក្នុងសង្កាត់ Thu Thiem ទីក្រុង Thu Duc ក៏ស្រាប់តែគាត់ដួលទៅនឹងដី បន្ទាប់ពីត្រូវខ្សែខ្លែងទាក់បំពង់ក ខណៈប្រពន្ធ​របស់​គាត់ដែលជិះ​ម៉ូតូ​មួយ​ផ្សេងទៀត ក៏​បាន​ឈប់ និង​ជួយ​គាត់ភ្លាមៗផងដែរ។

ក្រោយ​ពេល​កើតហេតុ អ្នក​បង្ហោះ​ខ្លែង​មួយ​ចំនួន​បាន​ប្រញាប់ប្រញាល់​ទៅ​កន្លែង​កើតហេតុ ហើយ​បាន​ប្រើ​ដែកកេះ​ និង​កាំបិត​ ដើម្បីជួយកាត់​ខ្សែ​ដែលជាប់នឹងករបស់លោក Nguyen Van Luy មុនពេលរត់គេចខ្លួនអស់។ បន្ទាប់មក អ្នកជំងឺ​ត្រូវបាន​បញ្ជូនទៅ​មន្ទីរពេទ្យ Le Van Thinh ដើម្បី​សង្គ្រោះ​បន្ទាន់​។ លោកវេជ្ជបណ្ឌិត Kieu Ngoc Minh នាយករងមន្ទីរពេទ្យ Le Van Thinh មានប្រសាសន៍ថា មន្ទីរពេទ្យបានទទួលអ្នកជំងឺនៅម៉ោងប្រហែល ៥ ល្ងាចថ្ងៃចន្ទ។ គ្រូពេទ្យ​បាន​និយាយ​ថា ខ្សែ​ខ្លែង​ធ្វើ​អំបោះ ឬ​ខ្សែ​ដែក ដើម្បីទប់កុំឱ្យដាច់ខ្សែពេលបង្ហោះ ខណៈមនុស្សភាគច្រើនចង់បង្ហោះខ្លែងឱ្យបានខ្ពស់ៗ។ ដូច្នេះ ការ​ជាប់​ពាក់ខ្សែខ្លែងដោយ​អចេតនា​ជាមួយ​អ្នក​ថ្មើរ​ជើង​ ឬអ្នកដំណើរ អាច​បណ្តាល​ឱ្យ​មាន​របួស​ធ្ងន់ធ្ងរ​យ៉ាង​ងាយ៕

អត្ថបទ៖ លីដា
ប្រភព៖ Tuoitre News