កូរ៉េខាងជើងបានបាញ់មីស៊ីលប្រហែល ១០គ្រាប់ គិតត្រឹមថ្ងៃពុធនេះតែមួយ ឆ្លើយតបទៅនឹងសមយុទ្ធ Vigilant Storm របស់សហរដ្ឋអាមេរិក និងកូរ៉េខាងត្បូង

អគ្គសេនាធិការចម្រុះរបស់កូរ៉េខាងត្បូង (JCS) តាមរយៈសារព័ត៌មានយ៉ុនហាប់ នៅថ្ងៃពុធនេះបានរាយការណ៍ថា កូរ៉េខាងជើងបានបាញ់មីស៊ីលប្រហែល ១០ ប្រភេទផ្សេងៗគ្នា រួមទាំងមីស៊ីលផ្លោងរយៈចម្ងាយខ្លីឆ្ពោះទៅទិសខាងលិច និងខាងកើត។ JCS មុននេះបានបញ្ជាក់ថា មីស៊ីលផ្លោងរយៈចម្ងាយខ្លីចំនួន ៣គ្រាប់ ត្រូវបានបាញ់បង្ហោះ ហើយក្នុងនោះមានមួយគ្រាប់បានធ្លាក់ចូលទៅក្នុងទឹកចម្ងាយ ៥៧ គីឡូម៉ែត្រភាគខាងកើតនៃទីក្រុង Sokcho ភាគខាងកើតរបស់កូរ៉េខាងត្បូង និងមួយទៀត ឆ្ពោះទៅកាន់កោះ Ulleung មុនពេលធ្លាក់ចូលទៅក្នុងទឹក ដែលជំរុញឱ្យអាជ្ញាធរមូលដ្ឋានកូរ៉េខាងត្បូង ចេញសេចក្តីប្រកាសអាសន្នដែនអាកាស។ JCS បាននិយាយថា វាគឺជាលើកទី ១ ហើយ ដែលមីស៊ីលផ្លោងរបស់កូរ៉េខាងជើងបានធ្លាក់នៅជិតដែនទឹកកូរ៉េខាងត្បូង។

វាបាននិយាយថា៖«យើងប្រកាសថា យោធារបស់យើងនឹងឆ្លើយតបយ៉ាងម៉ឺងម៉ាត់ចំពោះរឿងនេះ។ យោធារបស់យើងបានប្តេជ្ញាឆ្លើយតបយ៉ាងម៉ឺងម៉ាត់ចំពោះរឿងនេះ (ការបង្ករឿងនេះ)»។ ឆ្លើយតបទៅនឹងសកម្មភាពនោះ ប្រធានាធិបតីកូរ៉េខាងត្បូងលោក Yoon Suk-yeol ក៏បានកោះហៅកិច្ចប្រជុំក្រុមប្រឹក្សាសន្តិសុខជាតិ ហើយបានបញ្ជាឱ្យចាត់វិធានការឱ្យបានឆាប់រហ័ស និងតឹងរ៉ឹង ដើម្បើយល់ឱ្យបានច្បាស់ពីការបង្ករឿងរបស់កូរ៉េខាងជើង។ ប្រទេសជប៉ុនក៏បានបញ្ជាក់ពីការបាញ់មីស៊ីលរបស់កូរ៉េខាងជើងផងដែរ ដោយនាយករដ្ឋមន្ត្រីលោក Fumio Kishida បានប្រាប់អ្នកសារព័ត៌មានថា លោកគ្រោងនឹងកោះហៅ «កិច្ចប្រជុំសន្តិសុខជាតិឱ្យបានឆាប់តាមដែលអាចធ្វើទៅបាន»។ ការបាញ់បង្ហោះនៅថ្ងៃពុធរបស់ទីក្រុងព្យុងយ៉ាង បានកើតឡើងនៅពេលដែលកូរ៉េខាងត្បូង និងសហរដ្ឋអាមេរិកកាលពីថ្ងៃចន្ទ បានចាប់ផ្តើមសមយុទ្ធដែនអាកាសរួមគ្នាទ្រង់ទ្រាយធំរយៈពេល ៥ថ្ងៃ ដែលមានឈ្មោះថា «Vigilant Storm»៕

អត្ថបទ៖ លីដា
ប្រភព៖ Japan Times