ក្រុមហ៊ុន Meta គ្រោងនឹងចាប់ផ្តើមការបញ្ឈប់បុគ្គលិកទ្រង់ទ្រាយធំនៅសប្តាហ៍នេះ ដែលនឹងអាចប៉ះពាល់ដល់បុគ្គលិករាប់ពាន់នាក់ នេះបើតាមកាសែត Wall Street Journal ដែលបានរាយការណ៍នៅថ្ងៃអាទិត្យ ទី០៦ ខែវិច្ឆិកា ឆ្នាំ២០២២។ យ៉ាងណាក៏ដោយ Meta បានបដិសេធមិនធ្វើការអត្ថាធិប្បាយលើរបាយការណ៍របស់ WSJ នោះទេ។ ជាក់ស្ដែង Meta កាលពីក្នុងខែតុលា ក៏បានព្យាករណ៍ពីការចុះខ្សោយប្រចាំត្រីមាស ខណៈដែលការចំណាយកាន់តែច្រើននៅឆ្នាំក្រោយ នឹងកាត់បន្ថយតម្លៃទីផ្សារភាគហ៊ុនរបស់ Meta ប្រហែល ៦៧ ពាន់លានដុល្លារ ដែលជាការបន្ថែមការខាតបង់ជាងកន្លះពាន់ពាន់លានដុល្លារ ដែលបាត់បង់រួចហើយនៅឆ្នាំនេះ។

ការចុះថយនេះបានកើតឡើងនៅពេលដែល Meta កំពុងប្រឈមនឹងការប្រកួតប្រជែងកំណើនសេដ្ឋកិច្ចសកល ដូចជាការប្រកួតប្រជែងពី TikTok ការផ្លាស់ប្តូរឯកជនភាពពី Apple ការព្រួយបារម្ភអំពីការចំណាយដ៏ធំលើ Metaverse និងការគំរាមកំហែងពាក់ព័ន្ធនឹងបទប្បញ្ញត្តិ។ នាយកប្រតិបត្តិ លោក Mark Zuckerberg បាននិយាយថា លោករំពឹងថា ការវិនិយោគលើ Metaverse នឹងចំណាយពេលប្រហែលមួយទស្សវត្ស ដើម្បីទទួលបានផ្លែផ្កា។ ក្នុងពេលជាមួយគ្នានេះ គាត់ត្រូវតែផ្អាកការជួល បិទគម្រោង និងរៀបចំក្រុមឡើងវិញ ដើម្បីកាត់បន្ថយការចំណាយ។ ក្រុមហ៊ុនប្រព័ន្ធផ្សព្វផ្សាយសង្គមមួយនេះ កាលពីខែមិថុនាក៏បានកាត់បន្ថយផែនការជួលវិស្វករយ៉ាងហោច ៣០% ឆ្លើយតបនឹងការធ្លាក់ចុះសេដ្ឋកិច្ច។

ម្ចាស់ភាគហ៊ុនរបស់ Meta គឺក្រុមហ៊ុន Altimeter Capital Management នៅក្នុងលិខិតចំហមួយទៅកាន់លោក Mark Zuckerberg ក៏បាននិយាយពីមុនដែរថា ក្រុមហ៊ុនត្រូវការសម្រួលដោយការកាត់ការងារ និងការចំណាយដើមទុន ដោយបន្ថែមថា Meta បានធ្វើឱ្យវិនិយោគិនបាត់បង់ទំនុកចិត្ត ដោយសារវាបង្កើនការចំណាយ និងផ្តោតលើ Metaverse ខ្លាំងពេក។ ក្រុមហ៊ុនបច្ចេកវិទ្យាជាច្រើន រួមទាំង Microsoft, Twitter និង Snap បានកាត់បន្ថយការងារ និងកាត់បន្ថយការជួលក្នុងរយៈពេលប៉ុន្មានខែថ្មីៗនេះ ដោយសារកំណើនសេដ្ឋកិច្ចពិភពលោកធ្លាក់ចុះ ដោយសារអត្រាការប្រាក់ខ្ពស់ ការកើនឡើងអតិផរណា និងវិបត្តិថាមពលនៅអឺរ៉ុប៕

អត្ថបទ៖ លីដា
ប្រភព៖ Channel News Asia