រដ្ឋាភិបាលរបស់ប្រទេសទួរគីបានស្នើថា ខ្លួននឹងសងសឹករាល់ជនល្មើសដែលពាក់ព័ន្ធនឹងការវាយប្រហារដោយគ្រាប់បែកដ៏សាហាវនៅអ៊ីស្តង់ប៊ុល។ អាជ្ញាធរសន្តិសុខរបស់ប្រទេសនេះ កំពុងថ្កោលទោសយ៉ាងខ្លាំងលើក្រុមសកម្មប្រយុទ្ធ រួមទាំងគណបក្សពលករឃឺដ ឬ PKK សម្រាប់ការវាយប្រហារមួយនោះ។ គួររំលឹកជូនដែរថា ការបំផ្ទុះកាលពីថ្ងៃអាទិត្យនៅលើផ្លូវដើរទិញឥវ៉ាន់ដ៏មមាញឹកក្នុងទីក្រុងអ៊ីស្តង់ប៊ុល បានសម្លាប់មនុស្សយ៉ាងហោចណាស់ ៦នាក់ និងរបួស ៨១នាក់ ផ្សេងទៀត។ អាជ្ញាធរបាននិយាយថា ពួកគេបានចាប់ឃុំខ្លួនស្ត្រីជនជាតិស៊ីរីម្នាក់ ដែលសង្ស័យថា បានបង្កប់គ្រាប់បែក ក៏ដូចជាមនុស្សប្រមាណ ៥០នាក់  ផ្សេងទៀតដែលជាប់សង្ស័យ។

ស្ត្រីជនជាតិស៊ីរី តាមសេចក្តីរាយការណ៍បានប្រាប់អ្នកស៊ើបអង្កេតថា នាងត្រូវបានបណ្តុះបណ្តាលដោយពួកគណបក្សពលករឃឺដ ឬ PKK និងក្រុមសកម្មប្រយុទ្ធឃឺដផ្សេងទៀត ហើយបានចូលប្រទេសទួរគី ឆ្លងកាត់ភាគពាយ័ព្យនៃប្រទេសស៊ីរី ខណៈ PKK ត្រូវ​បាន​ដាក់​ក្នុង​បញ្ជី​ជា​អង្គការ​ភេរវជន​ដោយទួរគី។ រដ្ឋមន្ត្រីក្រសួងមហាផ្ទៃលោក Suleyman Soylu បានប្រាប់អ្នកសារព័ត៌មានកាលពីថ្ងៃចន្ទថា រដ្ឋាភិបាលទួរគីដឹងពីសារអ្វីដែលជនល្មើសចង់ផ្ញើទៅកាន់ខ្លួន។ លោក​ថា រដ្ឋាភិបាល​នឹង​សងសឹក​ពួកគេ​វិញជា​ថ្នូរ​នឹង​ការ​ដែលពួកគេធ្វើមកលើទួរគី។ ជាមួយគ្នានេះដែរ មានប្រជាពលរដ្ឋ​ជាច្រើន​នាក់​ក៏បាន​ទៅ​ទស្សនា​កន្លែង​បំផ្ទុះនោះ​កាលពី​ថ្ងៃ​ចន្ទ ដើម្បីដាក់​កម្រងផ្កា​ជូន​ជនរងគ្រោះដែលបានស្លាប់៕

អត្ថបទ៖ លីដា
ប្រភព៖ Yahoo