អន្តរជាតិ

ស្តេចស៊ុលតង់បានតែងតាំងមេដឹកនាំគណបក្សប្រឆាំងលោក Anwar Ibrahim ឱ្យក្លាយនាយករដ្ឋមន្ត្រីទី១០ របស់ម៉ាឡេស៊ី

BY
Lyda
November 24, 2022

វិមាន Istana Negara បានប្រកាសថា ប្រធានក្រុម Pakatan Harapan (PH) នៃសម្ព័ន្ធភាពគណបក្សប្រឆាំង គឺលោក Anwar Ibrahim នឹងក្លាយជានាយករដ្ឋមន្ត្រីទី១០ របស់ប្រទេសម៉ាឡេស៊ី។ សេចក្តីថ្លែងការណ៍​ដែលចេញ​ដោយ​ព្រះបរមរាជវាំង​បាន​និយាយ​ថា បុរស​វ័យ ៧៥ ឆ្នាំ​រូបនេះ​ នឹង​ត្រូវស្បថ​ចូល​កាន់​តំណែង​នៅ​ម៉ោង ៥ ល្ងាច​ថ្ងៃ​ព្រហស្បតិ៍ ទី២៤ ខែវិច្ឆិកា ថ្ងៃនេះផ្ទាល់។ សេចក្តី​ថ្លែងការណ៍​បាន​បន្ថែម​ថា​៖«​ព្រះមហាក្សត្រ​ចង់​ជម្រាបប្រាប់​លោក​នាយក​រដ្ឋមន្ត្រី និង​រដ្ឋាភិបាល​ថ្មី​ ត្រូវ​តែបង្កើត​រដ្ឋាភិបាលថ្មីជាមួយនឹងការ​ដាក់ខ្លួន និងគតិបណ្ឌិត»។

ទ្រង់បានបន្ដថា៖«ការពិតគឺថា ប្រជាជនសាមញ្ញមិនគួរទទួលបន្ទុកជាមួយភាពចលាចលនយោបាយដែលមិនចេះចប់នោះទេ នៅពេលដែលប្រទេសនេះត្រូវការរដ្ឋាភិបាលដែលមានស្ថិរភាព ដើម្បីជំរុញទិដ្ឋភាពសេដ្ឋកិច្ច និងការអភិវឌ្ឍន៍»។ សេចក្តីថ្លែងការណ៍របស់វិមានក៏បានក្រើនរំលឹកដល់សមាជិកសភាដែលជាប់ឆ្នោតត្រូវបង្ហាញពីអាទិភាព ការប្តេជ្ញាចិត្តខ្ពស់ ក៏ដូចជាការផ្តល់សេវាល្អបំផុតជូនប្រជាពលរដ្ឋ។

សេចក្តីថ្លែងការណ៍​បាន​បន្ត​ថា​៖ «​ព្រះមហាក្សត្រ​សូម​ដាស់តឿន​ថា អ្នក​ដែល​ឈ្នះ​គឺមិន​ឈ្នះ​អ្វី​ទាំងអស់ ហើយ​អ្នក​ដែលចាញ់​គឺមិន​បានចាញ់​អ្វី​ទាំងអស់​»​។ ការប្រកាសនេះបានកើតឡើងបន្ទាប់ពីគណបក្សភាគច្រើនបានយល់ព្រមចំពោះសំណើរបស់ស្តេចស៊ុលតង់ Abdullah Ahmad Shah សម្រាប់រដ្ឋាភិបាលរួបរួមមួយ បន្ទាប់ពីការបោះឆ្នោតសកលកាលពីថ្ងៃសៅរ៍ មិនអាចរកឃើញបក្សណាមួយឈ្នះដាច់គូប្រជែងរបស់ខ្លួនបាន។ ការដែលមិនមានអ្នកឈ្នះដាច់នេះនឹងអាចនាំមកនូវអស្ថិរភាព ខណៈដែលប្រទេសនេះឆ្លងកាត់​អស្ថិរភាពនយោបាយជាយូរមកហើយ៕

អត្ថបទ៖ លីដា
ប្រភព៖ Channel News Asia

Share This Post: