ថៃ៖ អ្នកជំនាញខាងមេរោគឆ្លងកំពូលរបស់ប្រទេសថៃបានព្រមានថា ប្រជាជនមិនគួររង់ចាំវ៉ាក់សាំងបង្ការជំងឺ COVID-19 ថ្មីជាងនេះទេ ស្របពេលដែលករណីឆ្លងថ្មីៗកំពុងកើនឡើងជាបណ្ដើរៗទៅហើយ។ នៅក្នុងការបង្ហោះលើហ្វេសប៊ុកកាលពីថ្ងៃសៅរ៍ លោកវេជ្ជបណ្ឌិត Yong Poovorawan បាននិយាយថា ករណីឆ្លងបានចាប់ផ្តើមកើនឡើងនៅពាក់កណ្តាលខែវិច្ឆិកា ហើយនឹងឈានដល់កម្រិតខ្ពស់បំផុតនៅក្នុងខែមករា។ ទោះ​យ៉ាង​ណាលោក​ថា តួលេខ​នឹង​ចាប់​ផ្តើម​ធ្លាក់​ចុះ​ពី​ពាក់​កណ្តាល​ខែ​កុម្ភៈ មុន​នឹង​ចាប់​ឡើង​វិញ​ក្នុង​រដូវ​វស្សា​ចាប់​ពី​ខែ​មិថុនា ដល់​ខែ​កញ្ញា។

ដូច្នេះ​ហើយ​លោក​បាន​និយាយ​ថា វា​ជា​រឿង​សំខាន់​សម្រាប់​មនុស្ស​ក្នុង​ការ​បង្កើន​ភាពស៊ាំ​របស់​ពួកគេ​ភ្លាមៗ ជាជាង​ការ​រង់ចាំ។ លោក​បាន​បន្ថែម​ថា ទោះបី​វ៉ាក់សាំង​ដែល​មាន​ក្នុង​ប្រទេស​ថៃ​កំណត់​គោលដៅ​លើវ៉ារ្យ៉ង់ចាស់​ក៏ដោយ ក៏​វា​នៅ​តែ​មាន​ប្រសិទ្ធភាព​ខ្លាំង។ លោកថា វ៉ាក់សាំងដែលកំណត់គោលដៅជាក់លាក់អាចផ្តល់ភាពស៊ាំកាន់តែច្រើន ប៉ុន្តែការទទួលដូសជំរុញ និងទទួលវ៉ាក់សាំងកាន់តែច្រើន នឹងមានឱកាសកាន់តែប្រសើរឡើងក្នុងការការពាររោគសញ្ញាធ្ងន់ធ្ងរ។ ដូច្នេះ គាត់​បាន​និយាយ​ថា អ្នក​រាល់​គ្នា​គួរ​តែ​ទទួល​បាន​យ៉ាង​ហោច​ណាស់​ ៣​ដង និង​ដូសទី៤ ​ក្នុង​រយៈ​ពេល​ប្រាំមួយ​ខែ។

លោកវេជ្ជបណ្ឌិត Yong បានបន្តទៀតថា វ៉ារ្យ៉ង់អូមីក្រុង និងប្រភេទរងរបស់វាដូចជា៖ BA.1, BA.2, BA.2.75, BA.4 និង BA.5 នៅតែរីករាលដាលបំផុតនៅក្នុងប្រទេសថៃ ហើយបានឆ្លងជិត ៧០% នៃចំនួនប្រជាជនទាំងអស់។ ចំពោះព័ត៌មាននៃការឆ្លងប្រភេទ Deltacron គាត់បាននិយាយថា វានឹងមិនមានបញ្ហានៅក្នុងប្រទេសថៃទេ ព្រោះវ៉ារ្យ៉ង់សំខាន់នៅក្នុងប្រទេសថៃគឺ «អូមីក្រុង»៕

អត្ថបទ៖ លីដា
ប្រភព៖ The Nation Thailand