បុរសវៀតណាមម្នាក់ត្រូវបានកាត់ទោសឱ្យជាប់គុក ១៦ឆ្នាំ ដោយសារបានធ្វើឱ្យចោរលួចឆ្កែរបស់គាត់បាត់បង់ជីវិត

បុរសវៀតណាមម្នាក់ត្រូវបានកាត់ទោសឱ្យជាប់គុក ១៦ឆ្នាំ ក្រោមការចោទប្រកាន់ពីបទមនុស្សឃាតកាលពីថ្ងៃពុធ ក្រោយពីគាត់បានសម្លាប់ចោរលួចឆ្កែរបស់គាត់។ កាលពីថ្ងៃទី០៧ ខែកញ្ញា ឆ្នាំមុន ជនជាប់ចោទឈ្មោះថា Lai Van Tho អាយុ ៦៦ឆ្នាំ បានដឹងមកថា បុគ្គលឈ្មោះ Vo Thanh Trung និងក្រុមគ្នីគ្នា បានលួចឆ្កែរបស់គ្រួសារគាត់ ហើយគាត់ និងកូនប្រុស ២ នាក់ផ្សេងទៀត ក៏បានចូលទៅប្រឈមមុខគ្នាជាមួយក្រុមនោះ។ នៅពេលដែលក្រុមរបស់បុគ្គលឈ្មោះ Trung ចាប់ផ្តើមប្រើប្រដាប់ឆក់ និងកាំបិតមកលើពួកគាត់, លោក Tho និងកូនប្រុសរបស់គាត់ ក៏បានរើសដំបងឬស្សីវាយតបទៅវិញ។

បន្ទាប់មកក្រុមទាក់ឆ្កែបានព្យាយាមរត់គេចខ្លួន ហើយលោតចូលទៅក្នុងប្រឡាយមួយនៅក្នុងស្រុក Binh Chanh។ បុគ្គលឈ្មោះ Trung បានព្យាយាមហែល​ទៅ​ត្រើយ​ម្ខាង ប៉ុន្តែ​មាន​មនុស្ស​ជា​ច្រើន​ទៀត​កំពុង​រង់ចាំ​គាត់ ដូច្នេះហើយបុគ្គលនោះក៏ហែលត្រឡប់ក្រោយ​វិញ។ យ៉ាងណាលោក Tho ដែល​កំពុង​ឈរ​នៅ​មាត់​ច្រាំង​នោះ បាន​វាយ​ក្បាល​បុគ្គល Trung ​ជា​ច្រើន​ដង​ដោយ​ដំបង​ឫស្សី ហើយ​មិនឱ្យគាត់​ឡើង​ពី​គោកឡើយ។ បុគ្គលឈ្មោះ Trung ក៏បានលង់ទឹកស្លាប់ទីនោះទៅ។

នៅតុលាការប្រជាជនទីក្រុងហូជីមិញ លោក Tho បានសារភាពថា បានវាយលោក Trung ប៉ុន្តែបាននិយាយថា គាត់មិនមានចេតនាសម្លាប់ទេ។ ជម្រាបដែរថា ការលួចឆ្កែគឺកម្រត្រូវបានចាត់ទុកជាបទល្មើសឧក្រិដ្ឋនៅក្នុងប្រទេសវៀតណាមណាស់ លុះត្រាតែសត្វដែលលួចនោះមានតម្លៃលើសពី ២ លានដុង (៨៦ ដុល្លារ)៕

អត្ថបទ៖ លីដា
ប្រភព៖ VNExpress