សមាគមដឹកជញ្ជូនផ្លូវគោករបស់ថៃបានឱ្យដឹងថា ឧស្សាហកម្មដឹកជញ្ជូនរបស់ប្រទេសថៃកំពុងនឹងសម្រេចចិត្តថា តើពួកគេគួរប្តូររថយន្តដឹកជញ្ជូន ដែលប្រើប្រេងម៉ាស៊ូតទាំង ៤០០,០០០ គ្រឿង ទៅជារថយន្តអគ្គិសនី (Electric vehicle) នៅខែមេសាឆ្នាំក្រោយ ឬយ៉ាងណា។ ប្រធានសមាគមលោក Apichart Prairungruang បាននិយាយថា ផែនការនេះបានកើតឡើង បន្ទាប់ពីរដ្ឋាភិបាលថៃបានចេញវិធានការគាំទ្រសម្រាប់រថយន្តអគ្គីសនី។ លោក​ថា សមាគម​នឹង​សាកល្បង​រថយន្ត EV ដើម្បី​សុវត្ថិភាព ដើម្បី​ដោះស្រាយ​កង្វល់​ជុំវិញ​ការ​ផ្ទុះ​អាគុយជាដើម។

ការធ្វើតេស្តនឹងផ្តោតលើការថែទាំ សេវាកម្មក្រោយពេលលក់ និងថាតើផ្លូវមានស្ថានីយសាកអាគុយគ្រប់គ្រាន់ សម្រាប់បំពេញដល់តម្រូវការរថយន្ត EV ដែលកំពុងរត់នៅលើផ្លូវបើកបរ ឬទេ។ វា​ក៏​នឹង​ប្រៀបធៀប​សមត្ថភាព​របស់​រថយន្ត​អគ្គិសនី និង​ម៉ាស៊ូត​ផង​ដែរ ព្រោះ​រថយន្ត EV ថ្មី​ នឹង​ត្រូវ​ប្រើ​សម្រាប់​ការ​ធ្វើ​ដំណើរ​ផ្លូវ​ឆ្ងាយ​ពី ៣០០ ទៅ ៥០០ គីឡូម៉ែត្រ។ លោក Apichart បានបន្ថែមថា វាគួរតែចំណាយពេលមិនលើសពី ១ ម៉ោង ៣០ នាទី ដើម្បីសាករថយន្ត EV ឱ្យពេញនោះទេ។ ទោះជាយ៉ាងណាក៏ដោយ គាត់មានការព្រួយបារម្ភអំពីអាយុកាលអាគុយរបស់រថយន្ត EV ដែលមានប្រហែល ៦ឆ្នាំ បើធៀបនឹង ៧-១០ ឆ្នាំសម្រាប់រថយន្តម៉ាស៊ូត។

លោក​បាន​បន្ត​ថា អាគុយ​ក៏​បាន​ធ្វើ​ឱ្យ​រថយន្ត​ដឹក​ជញ្ជូន​អគ្គិសនី​មាន​តម្លៃ​ថ្លៃ​ផង​ដែរ​ ក្នុង​តម្លៃ​ប្រហែល ៥-៦ លាន​បាត (១៤ ទៅ ១៦ ម៉ឺនដុល្លារ) ​ក្នុង​មួយ​គ្រឿង​ បើធៀប​នឹង​ ២.៨ លាន​ប៉ុណ្ណោះ ​សម្រាប់​រថយន្ត​ម៉ាស៊ូត។ ប៉ុន្តែលោក​បាន​កត់​សម្គាល់​ថា រថយន្ត​ដឹក​ជញ្ជូន​អគ្គិសនី​ចំណាយ​តិច​ក្នុង​ការ​ដំណើរ​ការ​ក្នុង​រយៈ​ពេល​វែង។ លោកបាននិយាយថា សមាគមដែលគ្របដណ្តប់ក្រុមហ៊ុនដែលប្រតិបត្តិការឡានដឹកទំនិញប្រហែល ៤០០,០០០ គ្រឿងមួយនេះ ចាប់អារម្មណ៍លើរថយន្ត EV ជាមធ្យោបាយនៃការសន្សំថ្លៃដឹកជញ្ជូន និងការពារបរិស្ថាន៕

អត្ថបទ៖ លីដា
ប្រភព៖ The Nation Thailand