មន្ត្រីអាមេរិក ៣នាក់ បានប្រាប់រ៉យទ័រកាលពីថ្ងៃអង្គារថា សហរដ្ឋអាមេរិកកំពុងរៀបចំផែនការចុងក្រោយ នៅក្នុងការបញ្ជូនប្រព័ន្ធការពារមីស៊ីល Patriot ទៅកាន់អ៊ុយក្រែន ដែលជាការសម្រេចចិត្តដែលអាចត្រូវបានប្រកាសភ្លាមៗនៅក្នុងសប្តាហ៍នេះ។ រំលឹកដែរថា អ៊ុយក្រែនបានស្នើសុំដៃគូលោកខាងលិចរបស់ខ្លួន សម្រាប់ការការពារដែនអាកាស រួមទាំងប្រព័ន្ធ Patriot ដែលផលិតដោយសហរដ្ឋអាមេរិក ដើម្បីការពារវាពីការទម្លាក់គ្រាប់បែករបស់រុស្ស៊ី រួមទាំងប្រឆាំងនឹងហេដ្ឋារចនាសម្ព័ន្ធថាមពលរបស់ខ្លួន។ ប្រព័ន្ធការពារដែនអាកាសដែលមានមូលដ្ឋានលើដី ដូចជា Patriot របស់ក្រុមហ៊ុន Raytheon Technology Corp ត្រូវបានបង្កើតឡើង ដើម្បីស្ទាក់ចាប់មីស៊ីលដែលបាញ់ចូលមក។

Patriot ត្រូវបានគេចាត់ទុកថា ជាប្រព័ន្ធការពារដែនអាកាសដ៏ទំនើបបំផុតមួយរបស់សហរដ្ឋអាមេរិក ហើយជាធម្មតាមានការខ្វះខាត ដោយសម្ព័ន្ធមិត្តជុំវិញពិភពលោកកំពុងប្រជែងយកវា។ លោក Alexander Vindman វរសេនីយ៍ទោកងទ័ពចូលនិវត្តន៍ ដែលបានដឹកនាំគោលនយោបាយអ៊ុយក្រែននៅឯសេតវិមានក្នុងអំឡុងពេលរដ្ឋបាលលោក ត្រាំ បាននិយាយថា៖«វាមានសារៈសំខាន់ខ្លាំងណាស់។ ទាំងនេះនឹងមានសមត្ថភាពគ្រប់គ្រាន់ ក្នុងការដោះស្រាយបញ្ហាប្រឈមផ្សេងៗគ្នាជាច្រើនដែលអ៊ុយក្រែនមាន ជាពិសេសប្រសិនបើរុស្ស៊ីនាំយកមីស៊ីលផ្លោងរយៈចម្ងាយខ្លីពីប្រទេសអ៊ីរ៉ង់»។ មន្ត្រី ២នាក់ ដែលនិយាយក្នុងលក្ខខណ្ឌមិនបញ្ចេញឈ្មោះបានឱ្យដឹងថា សេចក្តីប្រកាសអាចកើតឡើងនៅព្រឹកថ្ងៃព្រហស្បតិ៍ ប៉ុន្តែកំពុងរង់ចាំការយល់ព្រមជាផ្លូវការពីរដ្ឋមន្ត្រីការពារជាតិអាមេរិកលោក Lloyd Austin និងប្រធានាធិបតី ចូ បៃដិន៕

អត្ថបទ៖ លីដា
ប្រភព៖ Channel News Asia