ការិយាល័យអាកាសធាតុរបស់តៃវ៉ាន់ នៅថ្ងៃព្រហស្បតិ៍ ទី១៥ ខែធ្នូ ឆ្នាំ២០២២ បាននិយាយថា គ្រោះរញ្ជួយដីកម្រិត ៦.២ រ៉ិចទ័រ បានវាយប្រហារនៅឆ្នេរសមុទ្រភាគខាងកើតរបស់កោះ បន្ទាប់មកក៏មានការរញ្ជួយដីស្រាលៗជាច្រើនដង ដែលអាចដឹងបានដល់ទីក្រុងតៃប៉ិ។ គ្រោះរញ្ជួយដីនេះបានកើតឡើងនៅពាក់កណ្តាលថ្ងៃត្រង់ នៅចម្ងាយប្រហែល ៣០គីឡូម៉ែត្រ ពីឆ្នេរសមុទ្រនៃខោនធី Hualien ក្នុងជម្រៅរាក់ ៦គីឡូម៉ែត្រ។ ប៉ុន្តែទីភ្នាក់ងារស្ទាបស្ទង់ភូគព្ភសាស្ត្រអាមេរិកបានរាយការណ៍ថា គឺការរញ្ជួយមានកម្រិត ៥.៩ រ៉ិចទ័រ និងជម្រៅ ១២ គីឡូម៉ែត្រ។ យ៉ាងណា មិន​ទាន់​មាន​សេចក្តី​រាយការណ៍​ភ្លាមៗ​អំពី​ការ​ខូច​ខាត​ ឬ​អ្នក​រង​របួស​នោះ​ទេ។

លោក Chen Kuo-chang ប្រធាន​មជ្ឈមណ្ឌល​រញ្ជួយ​ដី​របស់​ការិយាល័យ​អាកាសធាតុ​បាន​ប្រាប់​អ្នក​យក​ព័ត៌មាន​ថា​៖ «​រញ្ជួយ​ដី​នេះ​អាច​ទទួល​អារម្មណ៍​ដឹងពាសពេញ​កោះ​តៃវ៉ាន់​ ព្រោះ​វា​ចេញពីជម្រៅរាក់​ខ្លាំង​។ រហូតមកដល់ពេលនេះ មានគ្រោះរញ្ជួយដីចំនួន ៨ លើក ហើយយើងរំពឹងថា នឹងមានគ្រោះរញ្ជួយដីបន្ថែមទៀតក្នុងរយៈពេលបីថ្ងៃខាងមុខ»។ អាជ្ញាធររថភ្លើងក្រោមដី និងផ្លូវដែករបស់តៃវ៉ាន់ ក៏បាននិយាយថា រថភ្លើងរត់ក្នុងល្បឿនត្រូវបានកាត់បន្ថយ ប៉ុន្តែសេវាកម្មមិនត្រូវបានបញ្ឈប់ទាំងស្រុងឡើយ។ គួរឱ្យដឹងដែរថា គ្រោះរញ្ជួយដីមួយចំនួនដែលមានកម្រិត ៦.០ ឬច្រើនជាងនេះ អាចបណ្ដាលឱ្យមានគ្រោះថ្នាក់ដល់ជីវិត ទោះបីជាភាគច្រើនវាអាស្រ័យលើកន្លែងដែលមានការរញ្ជួយ និងនៅជម្រៅប៉ុន្មានក៏ដោយ៕

អត្ថបទ៖ លីដា
ប្រភព៖ Channel News Asia