អង្គការសហប្រជាជាតិ UN បានចូលរួមជាមួយសហភាពអឺរ៉ុប EU នៅក្នុងការថ្កោលទោសការសម្រេចចិត្តរបស់ Twitter ក្នុងការព្យួរគណនីរបស់អ្នកកាសែតមួយចំនួន ដែលប្រើប្រាស់បណ្ដាញសង្គមមួយនេះ។ គួរឱ្យដឹងដែរថា អ្នកយកព័ត៌មានរបស់ New York Times, CNN និង Washington Post សុទ្ធតែស្ថិតក្នុងចំណោមអ្នកដែលត្រូវបានបិទព្យួរគណនី។ អង្គការសហប្រជាជាតិបានបង្ហោះសារថា សេរីភាពប្រព័ន្ធផ្សព្វផ្សាយមិនមែនជារបស់លេងទេ ខណៈដែលសហភាពអឺរ៉ុប ក៏បានគំរាមដាក់ទណ្ឌកម្មលើ Twitter ផងដែរ។ យ៉ាងណា អ្នកនាំពាក្យរបស់ Twitter បានអះអាងថា ការហាមឃាត់ទាំងនោះ គឺមានពាក់ព័ន្ធនឹងការចែករំលែកទិន្នន័យទីតាំងផ្ទាល់ខ្លួន។

លោកស្រី Melissa Fleming អគ្គលេខាធិការរងអង្គការសហប្រជាជាតិទទួលបន្ទុកទំនាក់ទំនងពិភពលោកបាននិយាយថា លោកស្រីមានការអាក់អន់យ៉ាងខ្លាំងចំពោះរបាយការណ៍ ដែលអ្នកសារព័ត៌មានកំពុងត្រូវបាន Twitter ព្យួរគណនី «តាមអំពើចិត្ត»។ លោកស្រី​បាន​និយាយ​ថា​៖ «​សេរីភាព​សារព័ត៌មាន​មិន​មែន​ជា​របស់​លេង​ទេ។ សារព័ត៌មានសេរីគឺជាមូលដ្ឋានគ្រឹះនៃសង្គមប្រជាធិបតេយ្យ និងជាឧបករណ៍សំខាន់ក្នុងការប្រយុទ្ធប្រឆាំងនឹងព័ត៌មានមិនពិតដែលបង្កគ្រោះថ្នាក់»។ កាលពីព្រឹកថ្ងៃសុក្រ ស្នងការសហភាពអឺរ៉ុបលោកស្រី Vera Jourova ក៏បានគំរាម Twitter ជាមួយនឹងការដាក់ទណ្ឌកម្មក្រោមច្បាប់សេវាកម្មឌីជីថលថ្មីរបស់អឺរ៉ុប ដែលលោកស្រីបាននិយាយថា ជាការទាមទារការគោរពសេរីភាពប្រព័ន្ធផ្សព្វផ្សាយ និងសិទ្ធិជាមូលដ្ឋាន៕

អត្ថបទ៖ លីដា
ប្រភព៖ BBC