ក្រុមហ៊ុន BioNTech កាលពីថ្ងៃព្រហស្បតិ៍បាននិយាយថា ខ្លួនបានដឹកជញ្ជូនវ៉ាក់សាំងបង្ការជំងឺ COVID-19 របស់ខ្លួនចំនួន ១១,៥០០ ដូស ទៅកាន់ប្រទេសចិន ដើម្បីផ្គត់ផ្គង់ដល់អាល្លឺម៉ង់ដែលធ្វើការនៅទីនោះ ខណៈវាជាវ៉ាក់សាំងបង្ការជំងឺ COVID-19 បរទេសដំបូងគេ ដែលត្រូវបានបញ្ជូនទៅប្រទេចិន។ BioNTech បាននិយាយថា ការចែកចាយដែលបានទៅដល់ប្រទេសចិនកាលពីថ្ងៃពុធ គឺមានទាំងវ៉ាក់សាំងដែលផ្តោតលើប្រភេទដើមនៃជំងឺ​ COVID-19 និងវ៉ាក់សាំងដែលបានធ្វើបច្ចុប្បន្នភាព ដែលផ្តោតលើអូមីក្រុង ប្រភេទរង BA.4/BA.5។

លោក Sean Marett ប្រធានផ្នែកពាណិជ្ជកម្ម និងពាណិជ្ជកម្មរបស់ BioNTech បាននិយាយថា៖«ការមកដល់នៃវ៉ាក់សាំងនៅចិនដីគោក គឺជាព្រឹត្តិការណ៍ដ៏អស្ចារ្យមួយសម្រាប់យើងក្នុងនាមជាដៃគូរួមគ្នាជាមួយ Fosun Pharma និងការខិតខំប្រឹងប្រែងរបស់យើង ក្នុងការដោះស្រាយជំងឺរាតត្បាតនេះ»។ BioNTech បាននិយាយថា៖«វ៉ាក់សាំងនេះត្រូវបានគេរំពឹងថា នឹងមាននៅក្នុងទីក្រុងប៉េកាំង សៀងហៃ ក្វាងចូវ សេនយ៉ាង និងឆេងឌូ។ ក្រុមនេះកំពុងធ្វើការជាមួយ Shanghai Fosun Pharmaceutical ដើម្បីបញ្ជូនវ៉ាក់សាំងទៅកាន់ប្រទេសចិន»។

ការដឹកជញ្ជូននេះបានកើតឡើង នៅពេលដែលទីក្រុងប៉េកាំងបានដកចេញនូវគោលនយោបាយដ៏តឹងរ៉ឹងរបស់ខ្លួនគឺ «zero-COVID» ដែលនាំឱ្យមានករណីកើនឡើងវិញ។ រហូតមកដល់ពេលនេះ ប្រទេសចិនបានទទូចឱ្យប្រើតែវ៉ាក់សាំងផលិតក្នុងស្រុក សម្រាប់ប្រជាជនរបស់ខ្លួនប៉ុណ្ណោះ ស្របពេលដែលវ៉ាក់សាំងទាំងនោះមិនផ្អែកលើបច្ចេកវិទ្យា mRNA របស់លោកខាងលិចទេ។ វ៉ាក់សាំង BioNTech នឹងត្រូវបានបញ្ជូនទៅក្រុមហ៊ុនអាល្លឺម៉ង់នៅក្នុងប្រទេសចិន ក៏ដូចជាទីតាំងស្ថានទូត ហើយការពិភាក្សាកំពុងដំណើរការជាមួយរដ្ឋាភិបាលសហភាពអឺរ៉ុបផ្សេងទៀត អំពីការនាំវាទៅឱ្យពលរដ្ឋដែលមានសញ្ជាតិផ្សេងទៀត៕

អត្ថបទ៖ លីដា
ប្រភព៖ Channel News Asia