តៃវ៉ាន់បាននិយាយថា យន្តហោះកងទ័ពអាកាសចិនចំនួន ៤៣ គ្រឿង បានឆ្លងកាត់ខ្សែបន្ទាត់មេឌីយ៉ានរបស់ខ្លួន
ក្រសួងការពារជាតិតៃវ៉ាន់ នៅថ្ងៃចន្ទ ទី២៦ ខែធ្នូ បាននិយាយថា យន្តហោះរបស់កងទ័ពអាកាសចិនចំនួន ៤៣ គ្រឿង បានឆ្លងកាត់ខ្សែបន្ទាត់មេឌីយ៉ានរបស់តៃវ៉ាន់ ក្នុងរយៈពេល ២៤ម៉ោងកន្លងមកនេះ ខណៈដែលទីក្រុងប៉េកាំងនៅតែបន្តសកម្មភាពយោធារបស់ខ្លួន។ ប្រទេសចិនដែលនៅតែទទូចថាកោះតៃវ៉ាន់ជាទឹកដីរបស់ខ្លួន បាននិយាយថា ខ្លួនបានធ្វើសមយុទ្ធនៅដែនសមុទ្រ និងដែនអាកាសជុំវិញកោះតៃវ៉ាន់ កាលពីថ្ងៃអាទិត្យ ដើម្បីឆ្លើយតបទៅនឹងអ្វីដែលខ្លួនបាននិយាយថា ជាការញុះញង់ពីកោះដែលគ្រប់គ្រងដោយលទ្ធិប្រជាធិបតេយ្យមួយនេះ ក៏ដូចជាសហរដ្ឋអាមេរិក។
កោះតៃវ៉ាន់ដែលបដិសេធយ៉ាងដាច់អហង្ការចំពោះការទាមទារអធិបតេយ្យភាពរបស់ចិន បាននិយាយថា សមយុទ្ធនេះបានបង្ហាញថាក្រុងប៉េកាំងកំពុងបំផ្លាញសន្តិភាពក្នុងតំបន់ និងព្យាយាមធ្វើឱ្យប្រជាជនតៃវ៉ាន់ភ័យខ្លាច។ យោងតាមផែនទីដែលផ្តល់ដោយក្រសួងការពារជាតិតៃវ៉ាន់ បានឱ្យដឹងថា យន្តហោះដែលពាក់ព័ន្ធនឹងការលុកលុយចុងក្រោយនេះ បានឆ្លងកាត់ខ្សែបន្ទាត់មេឌីយ៉ាននៃច្រកសមុទ្រតៃវ៉ាន់។ នាវាកងទ័ពជើងទឹកចិនចំនួន ៧ ក៏ត្រូវបានរកឃើញនៅជិតកោះតៃវ៉ាន់ផងដែរ។
ក្រសួងបាននិយាយថា តៃវ៉ាន់បានបញ្ជូនយន្តហោះចម្បាំងដើម្បីព្រមានយន្តហោះចិន ខណៈដែលប្រព័ន្ធមីស៊ីលបានត្រួតពិនិត្យការហោះហើររបស់ពួកគេ សម្រាប់ការឆ្លើយតបរបស់ខ្លួន។ ចិនបានបង្កើនសម្ពាធក្នុងរយៈពេលប៉ុន្មានឆ្នាំចុងក្រោយនេះលើកោះដែលគ្រប់គ្រងដោយខ្លួនឯងមួយនេះ ដើម្បីឱ្យកោះនេះទទួលយកការគ្រប់គ្រងរបស់ទីក្រុងប៉េកាំង។ រដ្ឋាភិបាលតៃវ៉ាន់និយាយថា ខ្លួនចង់បានសន្តិភាព ប៉ុន្តែនឹងការពារខ្លួនប្រសិនបើមានការវាយប្រហារ៕
អត្ថបទ៖ លីដា
ប្រភព៖ Channel News Asia