ប្រធានាធិបតីកូរ៉េខាងត្បូងលោក Yoon Suk-yeol បាននិយាយថា លោកនឹងជំរុញការបង្កើតអង្គភាពយោធាដែលមានឯកទេសខាងយន្តហោះគ្មានមនុស្សបើក ដើម្បីជាការឆ្លើយតបចំពោះការឈ្លានពានព្រំដែនរបស់កូរ៉េខាងជើង។ រំលឹកដែរថា យន្តហោះគ្មានមនុស្សបើករបស់កូរ៉េខាងជើង ៥ គ្រឿង បានឆ្លងចូលទៅក្នុងប្រទេសកូរ៉េខាងត្បូងកាលពីថ្ងៃចន្ទ ដោយជំរុញឱ្យទីក្រុងសេអ៊ូលដាក់ចេញយន្តហោះចម្បាំង និងឧទ្ធម្ភាគចក្រ ដើម្បីព្យាយាមបាញ់ទម្លាក់ពួកវាទាំងនោះ នៅក្នុងការឈ្លានពានលើកដំបូងចាប់តាំងពីឆ្នាំ២០១៧។

ឧបទ្ទវហេតុនេះបានធ្វើឱ្យមានចម្ងល់ឡើងវិញអំពីការការពារដែនអាកាសរបស់កូរ៉េខាងត្បូង នៅពេលដែលខ្លួនកំពុងព្យាយាមទប់ទល់នឹងការគំរាមកំហែងនុយក្លេអ៊ែរ និងមីស៊ីលរបស់កូរ៉េខាងជើង។ យោធាកូរ៉េខាងត្បូងបានបាញ់ព្រមាន និងប្រហែល ១០០ គ្រាប់ ពីឧទ្ធម្ភាគចក្រដែលបំពាក់ដោយកាំភ្លើងយន្ត ប៉ុន្តែបរាជ័យក្នុងការទម្លាក់យន្តហោះគ្មានមនុស្សបើកទាំងនោះ ខណៈពេលដែលពួកគេបានហោះហើរលើទីក្រុងជាច្រើនរបស់កូរ៉េខាងត្បូង រួមទាំងរដ្ឋធានីសេអ៊ូល អស់រយៈពេលប្រហែលប្រាំម៉ោង។

លោក Yoon បានប្រាប់កិច្ចប្រជុំគណៈរដ្ឋមន្ត្រីថា៖«ឧបទ្ទវហេតុនេះបានបង្ហាញពីការខ្វះខាតយ៉ាងខ្លាំងនៃការត្រៀមខ្លួន និងការហ្វឹកហ្វឺនរបស់យោធារបស់យើងអស់រយៈពេលជាច្រើនឆ្នាំកន្លងមក ហើយបានបញ្ជាក់យ៉ាងច្បាស់អំពីតម្រូវការសម្រាប់ការត្រៀមខ្លួន និងការហ្វឹកហ្វឺនកាន់តែខ្លាំង»៕

អត្ថបទ៖ លីដា
ប្រភព៖ Channel News Asia