មន្ត្រីក្នុងតំបន់បាននិយាយថា ព្យុះរដូវរងាដ៏មានឥទ្ធិពលមួយដែលបានវាយប្រហារអាមេរិកខាងជើង បានឆក់យកជីវិតមនុស្សកាន់តែច្រើន នៅក្នុងរដ្ឋញូវយ៉កសហរដ្ឋអាមេរិក។ ប្រធានស្រុកលោក Mark Poloncarz បាននិយាយកាលពីថ្ងៃពុធថា មនុស្សយ៉ាងហោចណាស់ ៣៤ នាក់ បានស្លាប់នៅក្នុង Erie County ដែលរួមមានទីក្រុង Buffalo ផងដែរ។ អាជ្ញាធរ​ក៏កំពុង​ព្យាយាម​កំណត់​អត្តសញ្ញាណ​ជនរងគ្រោះ​ចំនួន ៣ នាក់​។ ព្យុះ​ដែល​បាន​បោកបក់​ពាសពេញ​សហរដ្ឋ​អាមេរិក​កាលពី​ថ្ងៃ​ឈប់​សម្រាក​ចុង​សប្តាហ៍​នេះ​ បាន​សម្លាប់​មនុស្ស​យ៉ាងតិច​ ៦០​នាក់​ នៅក្នុង​រដ្ឋ​ចំនួន​៨​ របស់សហរដ្ឋអាមេរិក។

ឥឡូវនេះ Erie County មានអ្នកស្លាប់ច្រើនជាងគេក្នុងរយៈពេលប៉ុន្មានថ្ងៃនេះ ដែលច្រើនជាងអំឡុងពេលព្យុះកំបុតត្បូងនៅ Buffalo ដ៏អាក្រក់ ក្នុងអំឡុងឆ្នាំ១៩៧៧ ទៅទៀត។ កាលនោះ មានមនុស្ស ២៩ នាក់ បានស្លាប់នៅក្នុងព្យុះ នេះបើយោងតាមសេវាអាកាសធាតុជាតិ។ លោក Poloncarz បាននិយាយក្នុងសន្និសីទសារព័ត៌មានមួយកាលពីព្រឹកថ្ងៃពុធថា៖«វាជាព្យុះដ៏អាក្រក់មួយ ដែលមានមនុស្សស្លាប់យ៉ាងច្រើន»។ ប៉ុន្តែ​នៅ​ក្នុង​តំបន់​ដែល​រង​គ្រោះ​ខ្លាំង​បំផុត​ក្នុង​សហរដ្ឋ​អាមេរិក រួម​ទាំង​ទីក្រុង​ញូវយ៉ក កំពុង​ចាប់​ផ្តើម​ប្រសើរ​ឡើងវិញហើយ។

លោក Poloncarz បាននិយាយថា នៅក្នុង Erie County ប្រមាណជា ១,០០០ គ្រួសារ គ្មានថាមពល ហើយ ៩៥% នៃអ្នកស្រុកគួរតែមានថាមពលឡើងវិញនៅពេលឆាប់ៗនេះ។ ទីក្រុង Buffalo មានព្រិលច្រើនជាង ៤ ហ្វីត (១.២ ម៉ែត្រ) ដែលធ្វើឱ្យមានការវិវឌ្ឍន៍ការបោសសម្អាតផ្លូវ។ លោក Poloncarz បាននិយាយថា យ៉ាងហោចណាស់ ៦៥% នៃផ្លូវក្នុងទីក្រុង អាចមានផ្លូវយ៉ាងហោចណាស់មួយសម្រាប់ឆ្លងកាត់បណ្ដោះអាសន្ន ទោះបីជាការហាមឃាត់ការបើកបរនៅតែមានជាធរមាន ដោយសារស្ថានភាពគ្រោះថ្នាក់ក៏ដោយ៕

អត្ថបទ៖ លីដា
ប្រភព៖ BBC