សភាតំណាងរាស្រ្តអាមេរិក បានបរាជ័យក្នុងការជ្រើសរើសប្រធានថ្មីតាមរយៈការបោះឆ្នោត ជាលើកដំបូងបំផុតនៅក្នុងរយៈពេល ១០០ ឆ្នាំ។ រំលឹកដែរថា គណបក្សសាធារណរដ្ឋបានឈ្នះសំឡេងភាគច្រើននៅក្នុងសភា បន្ទាប់ពីការបោះឆ្នោតក្នុងខែវិច្ឆិកា ហើយសម័យប្រជុំថ្មីនៅថ្ងៃអង្គារនេះ ក៏នឹងត្រូវពន្យារពេលទៅពេលក្រោយទៀត។ សមាជិកសភាជាន់ខ្ពស់របស់បក្សសាធារណរដ្ឋ លោក Kevin McCarthy ធ្លាប់ត្រូវបានគេមើលឃើញថា ជាអ្នកមានការគាំទ្រច្រើនជាងគេក្នុងបក្ស ប៉ុន្តែលោក​បាន​ធ្លាក់​សំឡេង​ភាគច្រើន​នៅក្នុង​សន្លឹកឆ្នោត​ដំបូង​ បន្ទាប់ពី​បរាជ័យ​ក្នុង​ការ​ទទួល​បាន​ការ​គាំទ្រ​ពីសមាជិក និង​តំណាង​គណបក្ស​សាធារណរដ្ឋ​ផ្សេងទៀត។

គាត់ក៏បានបរាជ័យក្នុងការបោះឆ្នោត ២ជុំ បន្តបន្ទាប់ទៀតផងដែរ ដូច្នេះការ​បោះ​ឆ្នោត​លើក​ក្រោយ​នឹង​ត្រូវ​ធ្វើ​ឡើង​នៅ​ថ្ងៃ​ពុធ ឬ​ពេល​ក្រោយៗទៀត។ ជម្រាបដែរថា ដើម្បីក្លាយជាប្រធានសភា បេក្ខជនមួយត្រូវទទួលបានសម្លេងឆ្នោតច្រើនជាងពាក់កណ្តាលនៃចំនួនអ្នកតំណាងទាំង ៤៣៥ នាក់ របស់សភា។ ប្រព័ន្ធផ្សព្វផ្សាយក្នុងស្រុកនិយាយថា ការបោះឆ្នោតនៅថ្ងៃអង្គារនេះ គឺជាលើកទី១ ក្នុងរយ:ពេលមួយសតវត្ស ដែលបេក្ខភាពប្រធានសភាបានបរាជ័យក្នុងការឈ្នះឆ្នោត។ ការបោះឆ្នោតនេះក៏បង្ហាញពីការបែកបាក់គ្នានៅក្នុងគណបក្សសាធារណៈរដ្ឋ នៅពេលដែលពួកគេត្រូវតែបង្កើនកិច្ចខិតខំប្រឹងប្រែង ដើម្បីនឹងប្រឈមមុខនឹងរដ្ឋបាលលោក បៃដិន នៅពេលដែលការបោះឆ្នោតប្រធានាធិបតីឆ្នាំ២០២៤ នឹងខិតជិតមកដល់៕

អត្ថបទ៖ លីដា
ប្រភព៖ CNN