កូរ៉េខាងត្បូងចង់ស្នើច្បាប់ថ្មីមួយដែលអនុញ្ញាតឱ្យពលរដ្ឋអាចធ្វើការ ៦៩ម៉ោង/សប្ដាហ៍ ដើម្បីសន្សំម៉ោងទុកឈប់ថ្ងៃក្រោយ

រដ្ឋបាលរបស់ប្រធានាធិបតីកូរ៉េខាងត្បូងលោក Yoon Suk Yeol ចង់អនុញ្ញាតឱ្យពលរដ្ឋអាចធ្វើការរហូតដល់ ៦៩ម៉ោង ក្នុងមួយសប្តាហ៍ និង ជម្រើសធ្វើការបន្ថែមម៉ោងជាថ្នូរនឹងការឈប់សម្រាក ដែលជាផែនការរំពឹងនឹងលើកកម្ពស់កំណើនជីវភាពគ្រួសារ រួមជាមួយនឹងផលិតភាពការងារ។ ​ផែនការ​នេះគ្រោងនឹង​ប្រកាស​នៅ​ខែ​ក្រោយ ដែលវា​នឹង​ផ្តល់​ភាព​បត់បែន​បន្ថែម​ទៀត​ នៅក្នុង​ទីផ្សារ​ការងារ។ មន្ត្រីបាននិយាយថា ប្រជាជននឹងធ្វើការតិចថ្ងៃជាងមុន ដោយលើកទឹកចិត្តឱ្យពួកគេមានគ្រួសារ និងបង្កើនអត្រាមានកូន ដែលត្រូវបានព្យាករណ៍ថា នឹងឈានដល់កម្រិតទាបជាសកលត្រឹម ០.៧ ក្នុងឆ្នាំ២០២៤។

សព្វថ្ងៃប្រទេសកូរ៉េខាងត្បូង គោរពច្បាប់ធ្វើការត្រឹម ៥២ម៉ោង ក្នុងមួយសប្ដាហ៍ (៤០ម៉ោង ជាម៉ោងការងារធម្មតា បូកនឹង ១២ ម៉ោង ជាការបន្ថែមម៉ោង) ដែលត្រូវបានដាក់ឡើងតាំងពីឆ្នាំ២០១៨។ នេះមានន័យថា ពលរដ្ឋមិនអាចធ្វើការម៉ោងធម្មតា និងម៉ោងបន្ថែម លើសពីម៉ោងកំណត់បានឡើយ ខណៈច្បាប់ថ្មីអនុញ្ញាតឱ្យពលរដ្ឋធ្វើការបន្ថែមម៉ោងច្រើនជាងមុន ដើម្បីបូកម៉ោងបន្ថែមទាំងនោះចូលគ្នា សម្រាប់ជាថ្នូរនឹងការឈប់សម្រាកឱ្យបានច្រើនថ្ងៃនៅពេលក្រោយទៀត។ ក្រសួង​ការងារ និងពលកម្ម បាន​និយាយ​ក្នុង​សេចក្តី​ថ្លែងការណ៍​មួយ​ថា ច្បាប់ចាស់នេះដើរមិនទាន់សម័យកាលនោះទេ។ យ៉ាងណា ច្បាប់នេះត្រូវតែអនុម័តដោយរដ្ឋសភាជាមុនសិន ខណៈដែលសំឡេងភាគច្រើននៅរដ្ឋសភា គឺជាបក្សគូប្រជែងរបស់លោក Yoon៕

អត្ថបទ៖ លីដា
ប្រភព៖ រ៉យទ័រ