យោងតាមការចុះផ្សាយរបស់សារព័ត៌មាន CNN បានរាយការណ៍ថា ថ្មីៗនេះកំពូលតារា YouTube គឺលោក MrBeast កំពុងធ្វើឱ្យមនុស្សយ៉ាងហោចណាស់ ១,០០០នាក់ អាចមើលឃើញឡើងវិញ ដោយបានធ្វើការចំណាយថ្លៃវះកាត់ភ្នែកឱ្យអ្នកជំងឺភ្នែកឡើងបាយ ដែលមានភ្នែកមើលមិនឃើញ ឬស្ទើរតែមើលមិនឃើញទាំងស្រុង ដែលគ្មានលទ្ធភាពក្នុងការចំណាយថ្លៃវះកាត់បាន។ MrBeast ដែល​មាន​ឈ្មោះ​ពិត Jimmy Donaldson បាននិយាយ​ថា៖«យើង​កំពុង​ព្យាបាល​អ្នក​ភ្នែក​មួយ​ពាន់​នាក់» នៅក្នុង​វីដេអូ​មួយកាលពីថ្ងៃ​សៅរ៍ ដែល​មាន​អ្នក​ចូល​មើល​ជាង ៣២ លាន​ដង ​គិត​ត្រឹម​រសៀល​ថ្ងៃ​អាទិត្យ។ MrBeast បានសហកាជាមួយលោកគ្រូពេទ្យភ្នែក Jeff Levenson ហើយបានធ្វើការទាក់ទងទៅជម្រកដែលគ្មានផ្ទះសម្បែង និងគ្លីនិកឥតគិតថ្លៃ ដើម្បីចាប់ផ្ដើមប្រតិបត្តិការនេះឡើង។ មិនត្រឹមតែជួយវះកាត់ឱ្យអ្នកជំងឺនោះទេ លោកថែមទាំងឧបត្ថម្ភជាទឹកប្រាក់សម្រាប់គ្រួសារដែលខ្វះខាតខ្លាំងទៀតផង។

លោក Jeff Levenson ជាគ្រូពេទ្យឯកទេសវះកាត់និងខាងភ្នែក បានធ្វើការជាមួយក្រុមហ៊ុន Donaldson ដើម្បីធ្វើការវះកាត់ជុំទីមួយនៅ Jacksonville រដ្ឋ Florida ។ លោក Levenson បានសម្របសម្រួលកម្មវិធី «អំណោយនៃការមើលឃើញ» អស់រយៈពេលជាង ២០ ឆ្នាំមកហើយ ដែលផ្តល់ការវះកាត់ភ្នែកឡើងបាយដោយឥតគិតថ្លៃ សម្រាប់អ្នកជំងឺដែលគ្មានធានារ៉ាប់រងចំពោះជំងឺភ្នែកឡើងបាយនេះ។ លោក Levenson បាននិយាយថា៖«ពាក់កណ្តាលនៃភាពពិការភ្នែកទាំងអស់នៅក្នុងពិភពលោក គឺជាមនុស្សដែលត្រូវការការវះកាត់មួយ ដែលចំណាយត្រឹមរយៈពេល ១០នាទី»។ លោកបានប្រាប់ CNN ថា លោកត្រូវបានបំផុសគំនិតឱ្យជួយវះកាត់អ្នកជំងឺភ្នែកឡើងបាយ បន្ទាប់ពីបានទទួលការវះកាត់ភ្នែកឡើងបាយរបស់គាត់ផ្ទាល់។ លោកថា លោកមិនស្គាល់ MrBeast ពីមុនមកទេ ហើយមិនធ្លាប់ជឿថាមានមនុស្សនឹងទាក់ទងទៅរកគាត់ឱ្យសហកាគ្នាក្នុងការជួយអ្នកជំងឺភ្នែកឡើងបាយបែបនេះឡើយ។ លោកបានបន្ថែមថា លោកស្ទើរតែដាក់ទូរសព្ទចុះទៅហើយ នៅពេលដែល MrBeast បានទាក់ទងទៅរកគាត់។

លោកគ្រូពេទ្យ Jeff Levenson ក៏បានបង្ហាញពីចំណាប់អារម្មណ៍របស់គាត់ ហើយគាត់លើកទឹកចិត្តឱ្យមានការគាំទ្របន្ថែមទៀត ជាពិសេសគឺនៅក្នុងជួររដ្ឋាភិបាល ដើម្បីអាចឱ្យអ្នកជំងឺភ្នែកឡើងបាយដែលគ្មានប្រាក់គ្រប់គ្រាន់ជាច្រើនទៀត អាចមានឱកាសក្នុងការមើលឃើញឡើងវិញ៕

អត្ថបទ៖ លីដា
ប្រភព៖ CNN