ប្រធានាធិបតីអាមេរិកលោក ចូ បៃដិន បានច្រានចោលការស្នើបញ្ជូនយន្តហោះចម្បាំង F-16 ទៅកាន់ប្រទេសអ៊ុយក្រែន ទោះបីជាមានការអំពាវនាវជាថ្មីពីមន្ត្រីអ៊ុយក្រែនសម្រាប់ការគាំទ្រផ្លូវអាកាសក៏ដោយ។ នៅពេលសួរដោយអ្នកសារព័ត៌មានកាលពីថ្ងៃច័ន្ទថា តើសហរដ្ឋអាមេរិកនឹងផ្តល់យន្តហោះដែរឬទេ លោក បៃដិន បានឆ្លើយយ៉ាងសាមញ្ញថា «ទេ»។ ការ​អត្ថាធិប្បាយ​របស់​លោក​ធ្វើ​ឡើង​មួយ​ថ្ងៃ​បន្ទាប់​ពី​មេដឹកនាំ​អាល្លឺម៉ង់​ ក៏​បាន​ច្រានចោល​ការ​បញ្ជូន​យន្តហោះ​ចម្បាំងទៅអ៊ុយក្រែន។ អ៊ុយក្រែន​បាន​និយាយ​ថា ខ្លួន​ត្រូវ​ការ​យន្តហោះ​ដើម្បី​គ្រប់គ្រង​ដែន​អាកាស​របស់​ខ្លួន​ក្នុង​សង្គ្រាម​ដែល​កំពុង​បន្ត​ជាមួយ​រុស្ស៊ី។

F-16 Fighting Falcons ត្រូវបានចាត់ទុកថាជាយន្តហោះចម្បាំងដ៏គួរឱ្យទុកចិត្តបំផុតមួយរបស់ពិភពលោក ហើយត្រូវបានប្រើប្រាស់ដោយប្រទេសផ្សេងទៀតដូចជា បែលហ្សិក និងប៉ាគីស្ថាន។ ពួកវានឹងក្លាយជាការធ្វើឱ្យប្រសើរឡើងដ៏សំខាន់មួយប្រឆាំងនឹងយន្តហោះចម្បាំងសម័យសូវៀត ដែលអ៊ុយក្រែនកំពុងប្រើប្រាស់នាពេលបច្ចុប្បន្ន ដែលត្រូវបានធ្វើឡើងមុនពេលប្រទេសនេះប្រកាសឯករាជ្យពីសហភាពសូវៀតជាង ៣០ ឆ្នាំមុន។ ទោះជាយ៉ាងណាក៏ដោយ លោក បៃដិន បានច្រានចោលម្តងហើយម្តងទៀត នូវការអង្វររបស់អ៊ុយក្រែនចំពោះយន្តហោះទាំងនោះ ជំនួសមកវិញដោយផ្តោតលើការផ្តល់ជំនួយផ្នែកយោធានៅក្នុងតំបន់ផ្សេងទៀត។ ជាក់ស្ដែងសហរដ្ឋអាមេរិកបានប្រកាសកាលពីសប្តាហ៍មុនថា ខ្លួននឹងផ្គត់ផ្គង់ដល់ទីក្រុងគៀវ ជាមួយនឹងរថក្រោះ Abrams ចំនួន ៣១គ្រឿង ដោយចក្រភពអង់គ្លេស និងអាល្លឺម៉ង់ ក៏បានសន្យាគាំទ្រដូចគ្នាដែរ៕

អត្ថបទ៖ លីដា
ប្រភព៖ BBC