រាជធានីភ្នំពេញ៖ នៅថ្ងៃទី២៨ ខែមីនា ឆ្នាំ២០២៣ យោងតាមគណនីហ្វេសប៊ុកផ្ទាល់របស់ លោក ផន ផល្លា ដែលជាអ្នកគ្រប់គ្រងមណ្ឌលមែកឈើ កន្លែងទំនុកបង្រុមចិញ្ចឹមកុមារកំព្រានៅកម្ពុជា​ បានឱ្យដឹងថា បុរសម្នាក់ ដែលដើររុញរទេះលក់ការ៉េមតាមដងផ្លូវ តស៊ូរកប្រាក់ដើម្បីចិញ្ចឹមជីវិត ពេលនេះបានសម្រេចក្ដីស្រម៉ៃហើយ ទទួលបានកង់បីឥណ្ឌា (PassApp)មួយគ្រឿង សម្រាប់រត់ចិញ្ចឹមជីវិត។

ក្នុងគណនីហ្វេសប៊ុកខាងលើ បានសរសេររៀបរាប់យ៉ាងដូច្នេះថា៖ «តស៊ូបន្តទៀតណាប្អូន អោយតែយើងជាមនុស្សល្អ មិនថាក្រឬលំបាកយ៉ាងណាទេ គេគ្រប់គ្នានឹងស្រឡាញ់ អាណិតដល់ជីវិតរបស់យើងជាក់ជាមិនខាង—-។ ក្តីស្រម៉ៃរបស់ប្អូន ដែលចង់មានកង់បីឥណ្ឌា (PassApp) មួយសម្រាប់រត់ចិញ្ចឹមជីវិតនៅពេលនេះ គឺខ្ញុំបានបំពេញដល់គាត់ហើយ។ ទន្ទឹមនឹងគ្នាខ្ញុំក៏សូមគោរពថ្លែងអំណរគុណដល់បងប្អូនទាំងអស់ ដែលបានចូលរួមជួយប្អូនប្រុសជាមួយនឹងខ្ញុំ ៕ »

ប្រភព៖ Phalla Phorn

រាជធានីភ្នំពេញ៖ កាលពីថ្ងៃទី១៩ ខែមីនា ឆ្នាំ២០២៣ យោងតាមគណនីហ្វេសប៊ុកផ្ទាល់របស់ កីឡាការិនីកម្ពុជា ស្រួង ភាវី បានអំពាវនាវជាមុនរកអ្នកជំងឺចំហបេះដូងជាជនជាតិខ្មែរចំនួន ១៥នាក់ ដោយនាពេលខាងមុខ ក្រុមគ្រូពេទ្យជំនាញនឹងធ្វើដំណើរមកពិនិត្យអ្នកជំងឺនៅកម្ពុជា ហើយនាំទៅព្យាបាលនៅប្រទេសកូរ៉េផ្ទាល់តែម្ដង។

ក្នុងគណនីហ្វេសប៊ុកផ្ទាល់របស់អ្នកនាង ស្រួង ភាវី បានសរសេររៀបរាប់ដូច្នេះថា៖ «សូមគោរពជម្រាបជូនពុកម៉ែបងប្អូននៅដំណឹងល្អម្ដងទៀត នៅក្នុងអំឡុងខែ៤ខាងមុខនេះ ក្រុមគ្រូពេទ្យកូរ៉េ ពួកគាត់នឹងចុះទៅខ្មែរពិនិត្យមើលផ្ទាល់ ដល់ប្អូនៗដែលមានជំងឺបេះដូងចំហចំនួន១៥នាក់ ដើម្បីយកមកព្យាបាលនៅកូរ៉េតែម្តង។

ដូច្នេះបើពុកម៉ែបងប្អូនដែលមានអ្នកជំងឺនេះ ដែលមានអាយុចាប់ពី៥ឆ្នាំដល់២០ឆ្នាំ សូមសរសេរឈ្មោះ លេខទូរស័ព្ទ រូបថតរបស់អ្នកជំងឺ និងអាសយដ្ឋានដាក់ចូលក្នុងខម្មិនខាងក្រោម ដើម្បីងាយស្រួលយើងខ្ញុំធ្វើការជូន។ សូមអរគុណ! »

រាជធានីភ្នំពេញ៖ ស្ត្រីរងគ្រោះឈ្មោះ សៀង ស្រីអូន អាយុ២២ឆ្នាំ ដោយបានអះអាងថា គ្រូពេទ្យ នៅមន្ទីរសម្រាកព្យាបាលដើមអង្គ្រង (ព្រៃទទឹង) ស្ថិតក្នុងភូមិលៀក ឃុំព្រះនិពាន្វ ស្រុកគងពិសី ខេត្តកំពង់ស្ពឺ ធ្វើការធ្វេសប្រហែសបានបូមរំលូតទារកដាច់ទាំងស្បូន និងពោះវៀនតូចមកជាមួយ បណ្ដាលឱ្យរងបួសធ្ងន់។ ពេលនេះស្ត្រីរងគ្រោះនោះ បានទទួលមរណៈភាពហើយ កាលពីវេលាម៉ោង ១២ រំលងអធ្រាត្រ យប់មិញនៅថ្ងៃទី១៦ ខែមីនា ឆ្នាំ២០២៣។

នេះបើយោងតាមគណនីហ្វេសប៊ុកមួយឈ្មោះ Chum Sarath នៅថ្ងៃទី១៦ ខែមីនា ឆ្នាំ២០២៣ បានបង្ហោះ និងសរសេររៀបរាប់យ៉ាងដូច្នេះថា៖ « ប្អូនស្រី សៀង ស្រីអូន ដែលទៅទទួលសេវាពន្លូតកូន ដោយសារកូនបាត់បង់ជីវិតក្នុងផ្ទៃអាយុ ០៤ខែ ហើយត្រូវក្រុមគ្រូពេទ្យសម្ភពដើមអង្រ្កង ធ្វើការធ្វេសប្រហែសបណ្តាលអោយដាច់ពោះវៀននោះ គាត់បានទទួលមរណៈភាព កាលពីវេលាម៉ោង ១២ រំលងអធ្រាត្រ យប់មិញនៅថ្ងៃទី១៦ ខែមីនា ឆ្នាំ២០២៣ ដោយក្រុមគ្រូពេទ្យនៅមន្ទីពេទ្យកាល់ម៉ែត ក៏ដូចជា ក្រុមគ្រូពេទ្យនៅប្រទេសថៃ ព្យាយាមអស់ពីសមត្ថភាពហើយ។ សពប្អូនស្រីយកមកធ្វើបុណ្យតាមប្រពៃណី នៅផ្ទះ ភូមិពងទឹក ឃុំស្រែចែង ស្រុកជុំគិរី ខេត្តកំពត។ សូមដួងវិញ្ញាណក្ខន្ធរបស់ប្អូនស្រី ទៅកាន់ សុគតិភព » ៕

ប្រភព៖ Chum Sarath