នាយករដ្ឋមន្ត្រីថៃលោក ប្រាយុទ្ធ ចាន់អូចា បានប្រកាសនៅថ្ងៃអង្គារ ទី៣១ ខែមករា ឆ្នាំ២០២៣ នេះថា ប្រទេសថៃមិនចាំបាច់ទៅឈ្លោះជាមួយអ្នកដទៃទេ ព្រោះម៉ឺយថៃគឺជារបស់ថៃជារៀងរហូត។ លោក​បាន​ថ្លែង​បែបនេះ​ នៅក្នុង​អំឡុង​ពេល​សកម្មភាព​លើក​កម្ពស់​ទិវាម៉ឺយថៃ នៅ​ឯវិមាន​រដ្ឋាភិបាល។ ជម្រាបផងដែរថា ភាពចម្រូងចម្រាសបានផ្ទុះឡើងរវាងថៃនិងកម្ពុជា នាពេលថ្មីៗនេះ នៅពេលដែលកម្ពុជា ដែលជាម្ចាស់ផ្ទះនៃព្រឹត្តិការណ៍កីឡាស៊ីហ្គេមឆ្នាំនេះ បានសម្រេចប្រើប្រាស់ពាក្យ «គុនខ្មែរ» នៅក្នុងវិញ្ញាសាប្រដាល់សេរី។ ព្រឹត្តិការណ៍កីឡាស៊ីហ្គេមឆ្នាំ២០២៣ នឹងប្រព្រឹត្តឡើងចាប់ពីថ្ងៃទី០៥ ដល់ថ្ងៃទី១៧ ខែឧសភា។

នៅក្នុងព្រឹត្តិការណ៍នៅថ្ងៃអង្គារនេះ លោក ប្រាយុទ្ធ បានចូលរួមក្នុងសកម្មភាពជាច្រើនរួមទាំងការសម្តែងម៉ឺយថៃ ដែលធ្វើឡើងដោយសិស្សសាលា Nong Hin និងអ្នកប្រដាល់ផ្សេងទៀត។ នាយករដ្ឋមន្ត្រីរូបនេះក៏បានបង្ហាញពីជំនាញម៉ឺយថៃរបស់គាត់ មុនពេលគាត់បានសម្ដែងការអរគុណចំពោះអ្នករៀបចំ និងភ្នាក់ងារពាក់ព័ន្ធផងដែរ។

លោក ប្រាយុទ្ធ បានពណ៌នាម៉ឺយថៃថា ជាសិល្បៈក្បាច់គុនពិសេស និងប្រាជ្ញាវប្បធម៌ដ៏មានតម្លៃមួយ។ លោកក៏បានស្នើឱ្យស្ថាប័នពាក់ព័ន្ធបន្តលើកកម្ពស់ម៉ឺយថៃជា soft power ដែលអាចជួយជំរុញសេដ្ឋកិច្ចប្រកបដោយនិរន្តរភាព។ លោកនាយករដ្ឋមន្ត្រីក៏បានសង្ឃឹមថា «មហោស្រពម៉ឺយថៃដ៏អស្ចារ្យឆ្នាំ២០២៣» នឹងទទួលបានជោគជ័យយ៉ាងខ្លាំង។ ពិធីបុណ្យនេះនឹងប្រព្រឹត្តទៅចាប់ពីថ្ងៃទី០៤ ដល់ថ្ងៃទី០៦ ខែកុម្ភៈ នៅឧទ្យាន Rajabhakti របស់ភូមិ Hua Hin​៕

អត្ថបទ៖ លីដា
ប្រភព៖ The Nation Thailand