មេធាវី​ល្បី​មួយ​រូប​បាន​ព្រមាន​ថា អ្នកប្រើប្រាស់​បារី​អេឡិច​ត្រូនិកនៅ​ប្រទេស​ថៃ អាច​ប្រឈម​នឹង​ការ​ជាប់​ពន្ធនាគារ​រហូត​ដល់ ៥ឆ្នាំ និង​ពិន័យ​ជា​ប្រាក់​ធ្ងន់ធ្ងរ។ ការព្រមានរបស់មេធាវីលោក Ronnarong Kaewpetch បានកើតមានឡើង បន្ទាប់ពីមានការភាន់ច្រឡំជាសាធារណៈ ក្រោយប៉ូលីសក្រុងបាងកកបានទទួលសំណូកពីតារាស្រីតៃវ៉ាន់ម្នាក់ ដើម្បីដោះខ្លួនពីទោសដែលនាងបានប្រើប្រាស់បារី​អេឡិច​ត្រូនិក។ ឥឡូវនេះ មេប៉ូលិស ២នាក់ និងពលទាហាន ៥នាក់ មកពីស្ថានីយ៍ Huay Kwang កំពុងប្រឈមមុខនឹងការចោទប្រកាន់ផ្នែកវិន័យ និងព្រហ្មទណ្ឌ បន្ទាប់ពីបានដោះលែងសម្តែងនាង Charlene An ជាថ្នូរនឹងប្រាក់ ២៧,០០០ បាត។

អ្នកប្រើប្រាស់បណ្ដាញសង្គមថៃបានយល់ច្រលំថា ហេតុអ្វីបានជាប៉ូលីសឃាត់ខ្លួនតារាស្រីតៃវ៉ាន់ម្នាក់នោះ ខណៈដែលឧបករណ៍ Vape មានលក់ និងប្រើប្រាស់យ៉ាងទូលំទូលាយ។ ទោះ​ជា​យ៉ាង​ណា លោកមេធាវី​បាន​ព្រមាន​ថា អ្នកដែលប្រើប្រាស់បារី​អេឡិច​ត្រូនិកអាច​ត្រូវ​ផ្ដន្ទាទោស​ដាក់​ពន្ធនាគារ ៥ឆ្នាំ និង​ពិន័យ​ជា​ប្រាក់ ៤ដង​ នៃ​តម្លៃ​ឧបករណ៍។ លោក​បាន​បន្ថែម​ថា ការ​ជក់​បារី​នៅ​ទី​សាធារណៈ​ក៏​​រំលោភ​លើ​មាត្រា ៤២ នៃ​ច្បាប់​គ្រប់គ្រង​ថ្នាំ​ជក់​ ដែល​ត្រូវ​ពិន័យ​ជា​ប្រាក់ ៥,០០០ បាត។ លោកបានកត់សម្គាល់ថា ក្រសួងពាណិជ្ជកម្មបានចេញការហាមឃាត់ការនាំចូលបារី​អេឡិច​ត្រូនិក និងឧបករណ៍ដែលពាក់ព័ន្ធនានា ចាប់តាំងពីឆ្នាំ២០១៤។

ជម្រាបដែរថា ច្បាប់ថៃ ការនាំចូលឧបករណ៍ជក់បារី​អេឡិច​ត្រូនិក ឬទឹកថ្នាំរបស់វា បំពានផ្នែកទី២០ នៃច្បាប់នាំចូល/នាំចេញ ហើយត្រូវផ្តន្ទាទោសដាក់ពន្ធនាគាររហូតដល់ ១០ ឆ្នាំ និង/ឬពិន័យជាប្រាក់ ៥ដង នៃតម្លៃទំនិញ។ ក្រុមប្រឹក្សាការពារអ្នកប្រើប្រាស់ក៏បានហាមឃាត់ការលក់បារីអេឡិចត្រូនិច ឧបករណ៍ពាក់ព័ន្ធ និងទឹកថ្នាំរបស់វា នៅក្នុងឆ្នាំ២០១៥ ជាមួយនឹងការជាប់ពន្ធនាគាររហូតដល់ ៥ ឆ្នាំ និង/ឬពិន័យជាប្រាក់ចំនួន ៥០០,០០០ បាត (ជាង ១៥,០០០ ដុល្លារ) សម្រាប់អ្នកបំពាន៕

អត្ថបទ៖ លីដា
ប្រភព៖ The Nation Thailand