នាយកទីភ្នាក់ងារស៊ើបការណ៍សម្ងាត់កណ្តាលរបស់សហរដ្ឋអាមេរិក (CIA) លោក William Burns បានមានប្រសាសន៍ថា ប្រធានាធិបតីចិនលោក ស៊ី ជីនពីង បានបញ្ជាឱ្យយោធាត្រៀមខ្លួន ដើម្បីធ្វើការឈ្លានពានតៃវ៉ាន់នៅឆ្នាំ២០២៧។ លោក Burns បាននិយាយនៅក្នុងព្រឹត្តិការណ៍មួយ នៅសាកលវិទ្យាល័យ Georgetown ក្នុងទីក្រុង Washington DC កាលពីថ្ងៃព្រហស្បតិ៍ថា លោក ស៊ី បានចេញបញ្ជាទៅយោធារបស់ប្រទេសគាត់ ប៉ុន្តែនេះមិនមានន័យថា គាត់បានសម្រេចចិត្តឈ្លានពានតៃវ៉ាន់នៅឆ្នាំ២០២៧ ឬឆ្នាំផ្សេងទៀតនោះទេ ប៉ុន្តែវា​គឺ​ជា​ការ​រំលឹក​ថា លោក ស៊ី មាន​ភាពច្បាស់លាស់ និង​ផ្តោត​លើ​មហិច្ឆតា​របស់ខ្លួន។

លោក Burns បាននិយាយថា៖«ខ្ញុំនឹងមិនមើលស្រាលមហិច្ឆតារបស់ប្រធានាធិបតី ស៊ី ទាក់ទងនឹងតៃវ៉ាន់នោះទេ»។ នាយក CIA រូបនេះបាន​និយាយ​ថា លោក ស៊ី កំពុង​មើល​យ៉ាង​ដិតដល់​ចំពោះ​ការ​ឈ្លានពាន​របស់​រុស្ស៊ី​មក​លើ​អ៊ុយក្រែន។ លោក​ថា វា​ទំនង​​ដែល​ប្រធានាធិបតី​ចិនមិនទាន់ស្ងប់​ចិត្ត​ និង​ភ្ញាក់​ផ្អើល​បន្តិច​ ចំពោះការ​អនុវត្ត​របស់យោធា​រុស្ស៊ី។ បច្ចុប្បន្ន លោក ស៊ី កំពុង​កាន់​តំណែង​ជា​មេដឹកនាំ​បក្ស​កុម្មុយនិស្ត​ ក្នុងអាណត្តិ​ទី​៣ ខណៈអាណត្តិរបស់គាត់នឹងផុតកំណត់នៅឆ្នាំ២០២៧។ នៅឆ្នាំ ២០២១ អតីតមេបញ្ជាការទីបញ្ជាការឥណ្ឌូប៉ាស៊ីហ្វិកអាមេរិក លោក Philip Davidson ក៏ធ្លាប់បាននិយាយនៅក្នុងបទសម្ភាសន៍របស់ NHK ដែរថា ការគំរាមកំហែងរបស់ចិនចំពោះតៃវ៉ាន់នឹងបង្ហាញខ្លួនក្នុងរយៈពេល ៦ ឆ្នាំខាងមុខ។ ពោលគឺស្របនឹងឆ្នាំ២០២៧ តែម្ដង៕

អត្ថបទ៖ លីដា
ប្រភព៖ NHK