យ៉ាងហោចណាស់មនុស្ស ១៣នាក់ បានបាត់បង់ជីវិត នៅក្នុងគ្រោះរញ្ជួយដីកម្រិត ៦.៥រ៉ិចទ័រ នៅប្រទេសប៉ាគីស្ថាន និងអាហ្វហ្គានីស្ថាន

គ្រោះរញ្ជួយដីកម្រិត ៦.៥រ៉ិចទ័រ បានវាយប្រហារប្រទេសប៉ាគីស្ថាន និងអាហ្វហ្គានីស្ថានកាលពីថ្ងៃអង្គារ (ម៉ោងក្នុងតំបន់) ដែលបានជំរុញឱ្យអ្នកស្រុកត្រូវចាកចេញពីផ្ទះសម្បែង និងការិយាល័យរបស់ពួកគេ។ យ៉ាងហោចណាស់មនុស្ស ១៣នាក់ ត្រូវបានបញ្ជាក់ថាបានស្លាប់រហូតមកដល់ពេលនេះ ដោយសារវាបានបំផ្លាញអគារ និងបានបង្កឱ្យមានការរអិលបាក់ដីជាច្រើនកន្លែង ហើយពលរដ្ឋជាច្រើនទៀត ត្រូវបានបញ្ជូនទៅមន្ទីរពេទ្យដោយសារការភ័យតក់ស្លុត នេះបើតាមការចុះផ្សាយរបស់សារព័ត៌មាន CNN ។

ការស្ទាបស្ទង់ភូមិសាស្ត្រសហរដ្ឋអាមេរិកបានរាយការណ៍ថា ចំណុចកណ្តាលនៃគ្រោះរញ្ជួយដីនេះគឺស្ថិតនៅចម្ងាយ ៤០គីឡូម៉ែត្រ ពីភាគអាគ្នេយ៍នៃទីប្រជុំជនអាហ្វហ្គានីស្ថាន Jurm ក្នុងជួរភ្នំ Hindu Kush ដែលមានជម្រៅ ១៨៧.៦ គីឡូម៉ែត្រ។ នៅអាហ្វហ្គានីស្ថាន មនុស្សយ៉ាងតិច ៤ នាក់បានស្លាប់ និង ៧០ នាក់ផ្សេងទៀតបានរងរបួស នៅក្នុងតំបន់ដែលរងផលប៉ះពាល់ នេះបើយោងតាមលោក Sharafat Zaman Amar អ្នកនាំពាក្យក្រសួងសុខាភិបាលសាធារណៈ។ យ៉ាងណា ចំនួនអ្នកស្លាប់ត្រូវបានរំពឹងថា នឹងកើនឡើងថែមទៀត ដោយសារតែទីតាំងប៉ះពាល់ផ្សេងទៀត ស្ថិតនៅក្នុងតំបន់ដាច់ស្រយាលពិបាកក្នុងការទាក់ទងគ្នា៕

អត្ថបទ៖ លីដា
ប្រភព៖ CNN