យោងតាមការចុះផ្សាយរបស់សារព័ត៌មាន យ៉ុងហាប់ បានរាយការណ៍ថា កូរ៉េ​ខាង​ជើង​បាន​បាញ់​មីស៊ីល​ឆ្លង​ទ្វីប​ជា​ច្រើន​គ្រាប់ ​ឆ្ពោះ​ទៅ​កាន់​សមុទ្រ​ខាង​កើត​នៅ​ថ្ងៃ​ពុធនេះ។ អគ្គសេនាធិការចម្រុះ (JCS) បាននិយាយថា ខ្លួនបានរកឃើញការបាញ់បង្ហោះចេញពីតំបន់ Hamhung នៅឆ្នេរសមុទ្រភាគខាងកើតរបស់កូរ៉េខាងជើង ចាប់ពីម៉ោង ១០:១៥ នាទីព្រឹក ប៉ុន្តែមិនបានផ្តល់ព័ត៌មានលម្អិតផ្សេងទៀតភ្លាមៗនោះទេ។

ការបាញ់បង្ហោះនេះបានកើតឡើងនៅពេលដែលកូរ៉េខាងត្បូង និងសហរដ្ឋអាមេរិកកំពុងធ្វើសមយុទ្ធ Freedom Shield (FS) ក៏ដូចជាលំហាត់ហ្វឹកហ្វឺន Warrior Shield ។ សមយុទ្ធ FS មានរយៈពេល ១១ថ្ងៃ ដែលនឹងបញ្ចប់នៅថ្ងៃព្រហស្បតិ៍ស្អែកនេះ។

JCS បាននិយាយនៅក្នុងសេចក្តីប្រកាសព័ត៌មានមួយថា៖«ក្រោមឥរិយាបទការពាររួមបញ្ចូលគ្នាយ៉ាងរឹងមាំ យោធារបស់យើងនឹងបញ្ចប់ដោយជោគជ័យនូវសមយុទ្ធ FS ហើយបន្តអនុវត្តសមយុទ្ធ Warrior Shield យ៉ាងស្វិតស្វាញ»។ ជម្រាបដែរថា កូរ៉េខាងជើងក៏បានបាញ់មីស៊ីលផ្លោងរយៈចម្ងាយខ្លីមួយគ្រាប់ចូលទៅក្នុងសមុទ្រខាងកើត អំឡុងពេលដែលខ្លួនអះអាងថាជាសមយុទ្ធយុទ្ធសាស្ត្រ «ប្រឆាំងនុយក្លេអ៊ែរ» កាលពីចុងសប្តាហ៍កន្លងទៅ៕

អត្ថបទ៖ លីដា
ប្រភព៖ យ៉ុងហាប់