យោងតាមការចុះផ្សាយរបស់សារព័ត៌មាន បាងកកប៉ុស្ដិ៍ កាលពីពេលថ្មីៗនេះបានឱ្យដឹងថា អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត្រា បាននិយាយថា លោកត្រៀមខ្លួនរួចជាស្រេចក្នុងការជាប់ពន្ធនាគារនៅប្រទេសថៃ ប្រសិនបើលោកអាចចំណាយពេលវេលាដែលសេសសល់ជាមួយគ្រួសារ ដោយមិនគិតពីលទ្ធផលនៃការបោះឆ្នោត ដែលនឹងមកដល់នាពេលឆាប់ៗនេះឡើយ។ ថ្លែងនៅក្នុងបទសម្ភាសន៍ជាមួយសារព័ត៌មានជប៉ុន Kyodo លោក ថាក់ស៊ីន បាននិយាយថា លោកកំពុងថ្លឹងថ្លែងពេលវេលា មុនពេលអាចត្រឡប់ទៅប្រទេសថៃវិញនៅឆ្នាំនេះ បន្ទាប់ពីរស់នៅនិរទេសខ្លួនជាច្រើនឆ្នាំនៅបរទេស។

រំលឹកផងដែរថា លោក ថាក់ស៊ីន ត្រូវបានរដ្ឋប្រហារយោធាទម្លាក់ នៅក្នុងឆ្នាំ២០០៦ ហើយលោកបានចាកចេញពីប្រទេសថៃក្នុងឆ្នាំ២០០៨ មុនពេលត្រូវបានកាត់ទោសឱ្យជាប់ពន្ធនាគាររយៈពេល ២ឆ្នាំ ពីទំនាស់ផលប្រយោជន៍ (conflict of interest)។

ដោយសំដៅលើពេលវេលាដែលគាត់នៅឆ្ងាយពីប្រទេសកំណើត លោក ថាក់ស៊ីន ដែល​ឥឡូវ​មាន​អាយុ ៧៣ឆ្នាំ បាននិយាយ​ថា៖ «ឥឡូវនេះ​ខ្ញុំ​បាន​ជាប់​គុក ១៦ ឆ្នាំ​រួច​ហើយ ​នៅ​ក្នុង​គុកដ៏​ធំមួយដែល​រារាំង​ខ្ញុំ​មិន​ឱ្យ​នៅ​ជាមួយ​គ្រួសារ​។ ខ្ញុំបានរងទុក្ខគ្រប់គ្រាន់ហើយ។ ប្រសិនបើខ្ញុំត្រូវរងទុក្ខម្តងទៀតនៅក្នុងគុកតូចជាងនេះ វាមិនអីទេ»។ លោកបានបន្ថែមថា៖«ខ្ញុំមិនចាំបាច់ត្រូវទទួលទោសនោះទេ ប៉ុន្តែខ្ញុំនឹងទទួល ព្រោះខ្ញុំចង់នៅជាមួយចៅៗ។ ខ្ញុំគួរតែចំណាយពេលពេញមួយជីវិតរបស់ខ្ញុំជាមួយកូនៗ និងចៅរបស់ខ្ញុំ»។ លោកបានបន្ដទៀតថា លោកក៏នឹងមិនសុំឱ្យមានការលើកលែងទោសពីសភា បើទោះបីជាគណបក្សភឿថៃ ដែលកូនស្រីរបស់គាត់កំពុងឈរឈ្មោះជាបេក្ខភាពនាយករដ្ឋមន្ត្រីនៅទីនោះ ឈ្នះការបោះឆ្នោតក៏ដោយ៕

អត្ថបទ៖ លីដា
ប្រភព៖ បាងកកប៉ុស្ដិ៍