អង្គការណាតូបានថ្កោលទោសប្រទេសរុស្ស៊ី បន្ទាប់ពីការសម្រេចចិត្តរបស់លោក វ្ល៉ាឌីមៀ ពូទីន ក្នុងការដាក់ទីតាំងអាវុធនុយក្លេអ៊ែរយុទ្ធសាស្ត្រនៅក្នុងប្រទេសបេឡារុស្ស។ ណាតូកំពុងតាមដានយ៉ាងជិតដិតចំពោះស្ថានការណ៍នេះ ហើយបាននិយាយថា វិធានការនេះនឹងមិននាំឱ្យវាផ្លាស់ប្តូរយុទ្ធសាស្ត្រនុយក្លេអ៊ែររបស់ខ្លួនឡើយ។ ប៉ុន្តែអាមេរិក​បាន​និយាយ​ថា ខ្លួន​មិន​ជឿ​ថា​រុស្ស៊ី​កំពុង​រៀបចំ​ប្រើ​អាវុធ​នុយក្លេអ៊ែរ​នោះ​ទេ។ ជម្រាបផងដែរថា បេឡារុស្ស មានព្រំដែនវែងជាមួយអ៊ុយក្រែន ក៏ដូចជាជាមួយសមាជិកណាតូ ប៉ូឡូញ លីទុយអានី និងឡាតវៀ។

ប្រទេសអ៊ុយក្រែនបានអំពាវនាវឱ្យមានកិច្ចប្រជុំបន្ទាន់នៃក្រុមប្រឹក្សាសន្តិសុខអង្គការសហប្រជាជាតិ ដើម្បីដោះស្រាយការគំរាមកំហែងដែលអាចកើតមាន ក្រោយការប្រកាសរបស់ប្រធានាធិបតីលោក ពូទីន កាលពីថ្ងៃសៅរ៍។

យ៉ាងណា ប្រធានាធិបតីលោក ពូទីន បាននិយាយថា ទីក្រុងមូស្គូនឹងមិនផ្ទេរការគ្រប់គ្រងអាវុធរបស់ខ្លួនទៅទីក្រុង Minsk នោះទេ ហើយថាមេដឹកនាំបេឡារុស្ស Alexander Lukashenko ដែលជាសម្ព័ន្ធមិត្តដ៏រឹងមាំរបស់វិមានក្រឹមឡាំង និងជាអ្នកគាំទ្រការលុកលុយរបស់ខ្លួនលើអ៊ុយក្រែន បានលើកឡើងពីបញ្ហានេះជាមួយគាត់ជាយូរមកហើយ។ អ៊ុយក្រែន​និយាយ​ថា ​ទង្វើ​នេះ​រំលោភ​លើ​កិច្ចព្រមព្រៀង​មិន​រីកសាយភាយ​នុយក្លេអ៊ែរ ខណៈប្រធានាធិបតីលោក ​ពូទីន​ បាន​បដិសេធ និងជំនួស​មក​វិញ​ដោយការ​ប្រៀបធៀប​វា​ទៅ​នឹង​អាមេរិក​ដែល​ដាក់​អាវុធ​នៅ​អឺរ៉ុប៕

អត្ថបទ៖ លីដា
ប្រភព៖ BBC