សារព័ត៌មាន Associated Press នៅថ្ងៃពុធ ទី២៩ ខែមីនា ឆ្នាំ២០២៣ បានរាយការណ៍ថា ប្រធានាធិបតីអ៊ុយក្រែនលោក វ៉ូឡូឌីមៀ ហ៊្សែលឡិនស្គី បានអញ្ជើញប្រធានាធិបតីចិនលោក ស៊ី ជីនពីង ឱ្យមកបំពេញទស្សនកិច្ចនៅអ៊ុយក្រែន ដោយលោកនិយាយថា៖«យើងត្រៀមខ្លួនជាស្រេច ដើម្បីជួបគាត់នៅទីនេះ»។ ជម្រាបផងដែរថា លោក ស៊ី មិនដែលបាននិយាយជាមួយលោក ហ៊្សែលឡិនស្គី នោះទេ ចាប់តាំងពីរុស្ស៊ីបានចូលលុកលុយអ៊ុយក្រែនកាលពីខែកុម្ភៈឆ្នាំមុន ប៉ុន្តែប្រទេសចិនបានចេញផ្សាយផែនការ ១២ ចំណុច សម្រាប់ដំណោះស្រាយនយោបាយនៃវិបត្តិនៅអ៊ុយក្រែនកាលពីខែមុននេះ។

លោក ស៊ី បានពិភាក្សាអំពីជម្លោះជាមួយមិត្តសម្លាញ់របស់គាត់ គឺប្រធានាធិបតីរុស្ស៊ីលោក វ្ល៉ាឌីមៀ ពូទីន ខណៈពេលដែលកំពុងបំពេញទស្សនកិច្ចផ្លូវរដ្ឋទៅកាន់ទីក្រុងមូស្គូកាលពីសប្តាហ៍មុន បើទោះបីជាកិច្ចពិភាក្សាមិនបានបង្ហាញពីវឌ្ឍនភាពលើរបៀបបញ្ចប់សង្រ្គាមក៏ដោយ។ សំណើ​របស់​ចិន​រួម​មាន​ ការ​អំពាវ​នាវ​ឱ្យមាន​ការ​បន្ធូរបន្ថយ​ និង​បទ​ឈប់​បាញ់​ជា​យថាហេតុ​នៅ​អ៊ុយក្រែន។

ប៉ុន្តែ​អាមេរិក​បាន​ច្រានចោល​សំណើ​នេះ ដោយនិយាយ​ថា ​ចិន​បាន​បដិសេធ​មិន​ថ្កោលទោស​រុស្ស៊ី​ជុំវិញ​ការ​ឈ្លានពាននោះឡើយ។ សហរដ្ឋ​អាមេរិក​និយាយ​ថា បទ​ឈប់​បាញ់​នៅ​ពេល​នេះ​អាចឱ្យ​រុស្ស៊ីទទួលបានផលចំណេញ ហើយ​ផ្តល់​ពេល​វេលា​បន្ថែម​ទៀត​ដល់​កងទ័ព​របស់​លោក ពូទីន ដើម្បី​រៀបចំ​ក្រុម​ឡើង​វិញ។ អ៊ុយក្រែនស្វាគមន៍ចំពោះការចូលរួមការទូតរបស់ចិន ប៉ុន្តែលោក ហ៊្សែលឡិនស្គី បាននិយាយថា លោកនឹងពិចារណាដំណោះស្រាយសន្តិភាព លុះត្រាតែទាហានរុស្ស៊ីចាកចេញពីទឹកដីអ៊ុយក្រែន៕

អត្ថបទ៖ លីដា
ប្រភព៖ Channel News Asia