ស្ថានទូតកម្ពុជាប្រចាំប្រទេសថៃ អំពាវនាវឲ្យបងប្អូនខ្មែរប្រុងប្រយ័ត្នពីខ្យល់កខ្វក់ ដែលកំពុងតែបំពុលនៅប្រទេសថៃ

ភ្នំពេញ៖ បន្ទាប់ពីរងការបំពុលដោយសារតែខ្យល់កខ្វក់នៅក្នុងប្រទេសថៃអស់មួយរយៈមក កាលពីពេលថ្មីៗនេះ ស្ថាន​ឯកអគ្គរាជទូត​កម្ពុជា​ប្រចាំ​ប្រទេស​ថៃបានអំពាវនាវ​ដល់បងប្អូន​ប្រជាពលរដ្ឋ​ខ្មែរទាំងអស់ ដែល​កំពុងមានវត្តមាននៅ​ប្រទេស​ថៃ ​ឲ្យមានការ​ប្រុង​ប្រយ័ត្ន​ខ្ពស់ចំពោះសុខភាព មិនគួរធ្វើដំណើរចេញទៅក្រៅឡើយបើមិនចាំបាច់ តែបើត្រូវចេញក្រៅត្រូវតែពាក់ម៉ាសការពារប្រភេទ N95។

គួរបញ្ជាក់ផងដែរថា ខ្យល់កខ្វក់ PM2.5 បានគ្រប់ដំណប់ទីក្រុងបាងកក និងខេត្តជាច្រើននៅក្នុងប្រទេសថៃ ដោយខ្យល់កខ្វក់ PM2.5 នោះជាភាគល្អិតនៃធូលីមានទំហំតូចជាង ២.៥មីក្រូម៉ែត្រ ហើយវាត្រូវបានគេចាត់ទុកថា មានគ្រោះថ្នាក់បំផុត ដោយសារតែទំហំដ៏តូចរបស់វាអាចចូលជ្រៅទៅក្នុងសួត និងប៉ះពាល់សរីរាង្គផ្សេងទៀត។

ដូច្នេះបងប្អូនប្រជាពលរដ្ឋខ្មែរទាំងអស់ត្រូវតែបង្កើនការប្រុងប្រយ័ត្ន៕

អត្ថបទ៖ សេម