ខេត្ត Krabi របស់ប្រទេសថៃនឹងមានសីតុណ្ហភាពរហូតដល់ទៅ ៥៤ អង្សាសេ នៅថ្ងៃអាទិត្យស្អែកនេះ

នាយកដ្ឋានឧតុនិយមថៃបានព្យាករណ៍ថា ខេត្ត Krabi នឹងមានសីតុណ្ហភាពក្តៅបំផុតនៅថ្ងៃអាទិត្យនេះ ជាមួយនឹងសន្ទស្សន៍កម្ដៅឡើងដល់ ៥៤.២ អង្សាសេ នេះបើតាមការចុះផ្សាយរបស់សារព័ត៌មាន The Nation Thailand។ ទីតាំងក្តៅបំផុតទី២ គឺសង្កាត់ Bang Na របស់ទីក្រុងបាងកក ដែលសីតុណ្ហភាពត្រូវបានគេរំពឹងថា នឹងកើនឡើងដល់ ៥០.២ អង្សាសេ។ ទីតាំងក្តៅបំផុតចំនួន ៣ ផ្សេងទៀត គឺខេត្ត Phetchabun (៤៤.៣ អង្សាសេ), Chonburi (៤៣.២ អង្សាសេ) និងស្រុក Chok Chai របស់ខេត្ត Nakhon Ratchasima (៤១.៣ អង្សាសេ)។

ក្រសួងសុខាភិបាលរបស់ថៃក៏បានបែងចែកកម្រិតប៉ះពាល់ដូចជា៖

• សីតុណ្ហភាព ២៧-៣៧ អង្សាសេ៖ មនុស្សត្រូវបានណែនាំឱ្យ «មានការប្រុងប្រយ័ត្ន» ហើយអាចជួបប្រទះភាពអស់កម្លាំង ឈឺក្បាល ឬចង្អោរ។
• សីតុណ្ហភាព ៣២-៤១ អង្សាសេ៖ មនុស្សត្រូវបានណែនាំឱ្យ «មានការប្រុងប្រយ័ត្នខ្ពស់» ព្រោះវាអាចនាំឱ្យក្តៅខ្លួន និងអស់កម្លាំង ក្នុងចំណោមអ្នកដែលចំណាយពេលច្រើននៅខាងក្រៅ។
• សីតុណ្ហភាព ៤១-៥៤ អង្សាសេ៖ គឺជាសីតុណ្ហភាពដែល «គ្រោះថ្នាក់» និងអាចបណ្តាលឱ្យអស់កម្លាំងកំដៅ ឬរមួលសាច់ដុំ ខណៈក៏អាចឈានដល់ការដាច់សរសៃឈាមខួរក្បាលផងដែរ។

នាយកដ្ឋានក៏បានដាក់ចេញនូវការណែនាំដែលអាចអនុវត្តបាន ដើម្បីជួយប្រជាពលរដ្ឋរងបញ្ហាទាក់ទងនឹងកម្ដៅក្ដៅខ្លាំង។ ជំនួយដំបូងសម្រាប់ជនរងគ្រោះដោយការដាច់សរសៃឈាមដោយសារកម្ដៅក្ដៅខ្លាំងរួមមាន៖ ការផ្លាស់ទីពួកគេទៅក្នុងម្លប់ ហើយជូតពួកគេដោយក្រណាត់សើមត្រជាក់។ អ្នក​ដែល​ដួល​សន្លប់​ត្រូវ​បែរ​ទៅ​ម្ខាង​ ដើម្បី​ឱ្យដង្ហើមដើរស្រួល ហើយ​ត្រូវ​បញ្ជូន​ទៅ​មន្ទីរពេទ្យ​ជា​បន្ទាន់៕

អត្ថបទ៖ លីដា
ប្រភព៖ The Nation Thailand