ប៉ូលីសក្រុងតូក្យូបានបញ្ជូនអ្នកស៊ើបអង្កេតរបស់ខ្លួនមកកាន់កម្ពុជា ដើម្បីផ្ទេរ និងចាប់ខ្លួនជនជាតិជប៉ុនចំនួន ១៩នាក់ ដែលត្រូវបានសង្ស័យថា បានធ្វើការឆបោកតាមទូរស័ព្ទ ដោយផ្ដោតគោលដៅលើមនុស្សនៅក្នុងប្រទេសជប៉ុន។ នាយកដ្ឋានប៉ូលីសក្រុងតូក្យូ ទទួលបានដីកាចាប់ខ្លួនជនសង្ស័យ ១៩នាក់ ដែលមានអាយុចន្លោះពី ២៥ ទៅ ៥៥ឆ្នាំ។ ប្រភពស៊ើបអង្កេតបាននិយាយថា ជនសង្ស័យត្រូវបានគេចោទប្រកាន់ថា បានបោកប្រាស់ប្រាក់ប្រហែល ២៥០,០០០ យ៉េន ឬប្រហែល ១,៩០០ ដុល្លារ ពីអ្នករស់នៅទីក្រុងតូក្យូម្នាក់ ដែលស្ថិតក្នុងវ័យ ៦០ឆ្នាំ កាលពីខែមករា។

ក្រុម​ជនសង្ស័យ​បាន​ផ្ញើ​សារ​ក្លែងក្លាយ​ព្រមាន​ស្ត្រីជាជនរងគ្រោះ ​ពាក់ព័ន្ធនឹងការ​បង់​ប្រាក់​សម្រាប់​សេវា​អនឡាញ ហើយសមាជិក​ក្រុម​នេះ​ត្រូវ​បាន​គេ​ជឿ​ថា ​បាន​ប្រតិបត្តិការ​ចេញ​ពី​បន្ទប់​សណ្ឋាគារ​មួយនៅ​ក្នុង​ក្រុង​ព្រះសីហនុ​។ អាជ្ញាធរ​កម្ពុជា​បាន​រឹបអូស​វត្ថុតាង​សម្រាប់​ការ​ឆបោក បញ្ជី​ឈ្មោះ​ពលរដ្ឋ​ជប៉ុន​ដែលជា​គោលដៅ​ឆបោក និង​ទូរសព្ទ​មួយ​ចំនួន​ធំ​ពី​បន្ទប់​សណ្ឋាគារ ហើយវត្ថុ​តាងទាំងនោះក៏​​បាន​ប្រគល់ទៅ​ឱ្យ​ភាគី​ជប៉ុន​រួចហើយដែរ។ អ្នកស៊ើបអង្កេតប្រហែល ៥០នាក់ បានចាកចេញពីអាកាសយានដ្ឋាន Haneda ទីក្រុងតូក្យូ មកកាន់កម្ពុជានៅព្រឹកថ្ងៃចន្ទនេះ។ ប៉ូលីសទីក្រុងតូក្យូគ្រោងនឹងផ្ទេរជនសង្ស័យនៅថ្ងៃអង្គារ ដើម្បីបញ្ជូនខ្លួនពួកគេមកកាន់ប្រទេសជប៉ុន៕

អត្ថបទ៖ លីដា
ប្រភព៖ NHK