Twitter បានចាប់ដៃគូជាមួយ eToro ដើម្បីអនុញ្ញាតឱ្យអ្នកប្រើប្រាស់អាចជួញដូរភាគហ៊ុន និងគ្រីបតូ

ប្រព័ន្ធផ្សព្វផ្សាយសង្គម Twitter របស់សហរដ្ឋអាមេរិក បានចងសម្ព័ន្ធភាពជាមួយក្រុមហ៊ុនអនឡាញមួយ ដើម្បីអនុញ្ញាតឱ្យអ្នកប្រើប្រាស់អាចជួញដូរភាគហ៊ុន និងរូបិយប័ណ្ណគ្រីបតូ។ វេទិកាជួញដូរ និងវិនិយោគ eToro បានប្រកាសពីភាពជាដៃគូនេះកាលពីថ្ងៃព្រហស្បតិ៍ ហើយវានឹងផ្តល់នូវការចូលទៅកាន់តារាងតម្លៃ (live price charts) ដែលគ្របដណ្តប់លើភាគហ៊ុន រូបិយប័ណ្ណគ្រីបតូ និងទ្រព្យសម្បត្តិផ្សេងទៀតតាមរយៈមុខងារ cashtag ។

មហាសេដ្ឋីលោក Elon Musk បានទិញ Twitter កាលពីឆ្នាំមុន ហើយបានស្នើថាវេទិកានេះនឹងក្លាយជាប្លុកអគារសម្រាប់ «កម្មវិធីគ្រប់យ៉ាង» ដែលមានឈ្មោះថា X ។ កម្មវិធីនេះត្រូវបានគេរំពឹងថា នឹងរួមបញ្ចូលការទូទាត់តាមអេឡិចត្រូនិក និងមុខងារផ្សេងៗទៀតដែលប្រើប្រាស់ក្នុងជីវិតប្រចាំថ្ងៃ។ ប្រព័ន្ធផ្សព្វផ្សាយអាមេរិកនិយាយថា ការពង្រីកសេវាកម្មហិរញ្ញវត្ថុតាមរយៈភាពជាដៃគូ គឺជាផ្នែកមួយនៃកិច្ចខិតខំប្រឹងប្រែងរបស់លោក Musk ក្នុងការអភិវឌ្ឍន៍កម្មវិធីបែបនេះ៕

អត្ថបទ៖ លីដា
ប្រភព៖ CNBC