មហាសេដ្ឋីលោក Elon Musk បាននិយាយថា លោកនឹងបើកដំណើរការប្រព័ន្ធឆ្លាតវៃសិប្បនិម្មិត AI «TruthGPT» ដើម្បីមកប្រកួតប្រជែងជាមួយ ChatGPT ដែលជាកម្មវិធីគាំទ្រដោយក្រុមហ៊ុន Microsoft និង Google។ មហាសេដ្ឋីរូបនេះ បានរិះគន់ដោយចំៗ ទៅលើក្រុមហ៊ុន OpenAI ដែលជាក្រុមហ៊ុននៅពីក្រោយ chatbot របស់ ChatGPT ថាបានបណ្តុះបណ្តាល AI ឱ្យចេះកុហក ហើយបាននិយាយថា OpenAI បានក្លាយជាអង្គភាពរកប្រាក់ចំណេញ, កូដ​បិទ​ជិត closed source និងជាសម្ព័ន្ធមិត្តយ៉ាងជិតស្និទ្ធជាមួយ Microsoft។

គាត់ក៏បានចោទប្រកាន់លោក Larry Page ដែលជាសហស្ថាបនិក Google ថា មិនបានយកចិត្តទុកដាក់លើសុវត្ថិភាពពាក់ព័ន្ធនឹង AI ផងដែរ។

លោក Musk បាននិយាយនៅក្នុងបទសម្ភាសន៍ជាមួយ Tucker Carlson របស់ទូរទស្សន៍ Fox News Channel ថា៖«ខ្ញុំនឹងចាប់ផ្តើមអ្វីមួយ ដែលខ្ញុំហៅថា TruthGPT ឬ AI ស្វែងរកការពិត ដែលព្យាយាមយល់ពីធម្មជាតិនៃសកលលោក»។ គាត់បាននិយាយថា TruthGPT អាចជាផ្លូវដ៏ល្អបំផុតទៅកាន់សុវត្ថិភាព ដែលនឹងមិនបំផ្លាញមនុស្ស។ លោកថា ប្រព័ន្ធនេះចាប់ផ្តើមក្រោយគេពិតមែន ប៉ុន្តែគាត់នឹងព្យាយាមបង្កើតជម្រើសទីបី។ យ៉ាងណាក៏ដោយទាំងលោក Elon Musk, ក្រុមហ៊ុន OpenAI, Microsoft និងលោក Larry Page មិនបានឆ្លើយតបភ្លាមៗចំពោះសំណើសុំការអត្ថាធិប្បាយរបស់រ៉យទ័រទេ៕

អត្ថបទ៖ លីដា
ប្រភព៖ រ៉យទ័រ