ក្រសួង​សុខាភិបាល​ថៃ​បាន​ប្រកាស​ពី​វិធានការ​ ដើម្បី​ដោះស្រាយ​រលក​ថ្មី​នៃ​ជំងឺ COVID-19 ដែល​គេ​រំពឹង​ថា​ នឹង​ផ្ទុះឡើងក្រោយប្រជាជន​ត្រឡប់​មកពី​បុណ្យ​សង្ក្រាន្តវិញ​។ លោកវេជ្ជបណ្ឌិត Opas Karnkawinpong លេខាធិការអចិន្ត្រៃយ៍របស់ក្រសួងបាននិយាយថា មនុស្សជាច្រើនបានចូលរួមពិធីបុណ្យសង្ក្រាន្តនៅកន្លែងដែលមានមនុស្សច្រើន ដោយមិនចាត់វិធានការដើម្បីការពារខ្លួនទេ។ អាស្រ័យហេតុនេះ ក្រសួង​សុខាភិបាល​​រំពឹង​ថា​ នឹង​មានចំនួនអ្នកឆ្លង​ច្រើន​នៅ​ពេល​បុណ្យ​ឈប់​សម្រាកត្រូវបានបញ្ចប់។ អ្នក​ដែលទៅ​កន្លែង​មាន​មនុស្ស​ច្រើន​គួរ​តែ​ឃ្លាំ​មើល​ខ្លួន​ឯង​រយៈពេល ៧​ថ្ងៃ ហើយ​នៅ​ឱ្យ​ឆ្ងាយ​ពី​មនុស្សចាស់ ​ឬ​អ្នកដែលឈឺ ហើយពួកគេក៏គួរតែធ្វើតេស្តរហ័ស (ATK) ប្រសិនបើពួកគេមានអារម្មណ៍មិនស្រួលខ្លួន។

លោក Opas ​បាន​ណែនាំឱ្យ​ប្រជាពលរដ្ឋ​ការពារ​ខ្លួន​តាម​ជំហាន​ដូច​ខាង​ក្រោម៖

• អ្នកងាយរងគ្រោះគួរតែលេបថ្នាំបង្ការជំងឺគ្រុនផ្តាសាយ និងចាក់ដូសជំរុញជំងឺ COVID-19 រៀងរាល់ឆ្នាំដើម្បីការពារខ្លួន។
• ពាក់ម៉ាស់មុខនៅកន្លែងសាធារណៈជានិច្ច ប្រសិនបើនៅជិតមនុស្សចាស់ ឬអ្នកជំងឺ ដូចជានៅមន្ទីរពេទ្យ និងកន្លែងមនុស្សចាស់។
• ធ្វើតេស្តរហ័ស ATK ប្រសិនបើមានសញ្ញាណាមួយនៃបញ្ហាផ្លូវដង្ហើម។

លោក Opas ក៏បានប្រកាសវិធានការចំនួន ៤ សម្រាប់បុគ្គលិកសុខាភិបាលសាធារណៈរួមមាន៖

• ជំរុញយុទ្ធនាការផ្សព្វផ្សាយការយល់ដឹងជាសាធារណៈអំពីភាពចាំបាច់នៃការទទួលយកវ៉ាក់សាំង COVID-19 និងជំងឺគ្រុនផ្តាសាយប្រចាំឆ្នាំ។
• មន្ទីរពេទ្យត្រូវមានថ្នាំ និងគ្រែដែលត្រៀមរួចជាស្រេច ដើម្បីទប់ទល់នឹងការកើនឡើងនៃករណី COVID-19 ថ្មីៗ។
• តាមដានករណី និងការស្លាប់ដែលពាក់ព័ន្ធនឹង COVID-19 នៅក្នុងខេត្តនានា។ សំណាកក៏គួរតែត្រូវយកពីអ្នកជំងឺដែលស្លាប់ ដើម្បីធ្វើតេស្ដ RT-PCR នៅនាយកដ្ឋានវិទ្យាសាស្ត្រវេជ្ជសាស្ត្រ។ សាវតារនៃអ្នកស្លាប់ក៏គួរត្រូវបានស៊ើបអង្កេត និងរាយការណ៍ទៅក្រសួងក្នុងរយៈពេល ២៤ ម៉ោង។
• ការស៊ើបអង្កេត និងតាមដានប្រភពនៃការឆ្លងមេរោគ ប្រសិនបើអ្នកជំងឺស្លាប់ ឬមានរោគសញ្ញាធ្ងន់ធ្ងរ៕

អត្ថបទ៖ លីដា
ប្រភព៖ The Nation Thailand