ប្រជាជនដែលប្រើប្រាស់ការដឹកជញ្ជូនសាធារណៈ និងធ្វើការនៅតាមផ្សារទំនើប រោងកុន និងបារ នៅក្នុងទីក្រុងហាណូយ ត្រូវបានគេណែនាំឱ្យមានការពាក់ម៉ាស់ ខណៈពេលដែលទីក្រុងនេះកំពុងមានការផ្ទុះឡើងនៃករណីជំងឺ COVID-19 នេះបើតាមការចុះផ្សាយដោយ VNExpress។ នៅក្នុងបទបញ្ជាមួយកាលពីយប់ថ្ងៃអង្គារ គណៈកម្មាធិការប្រជាជនទីក្រុងបាននិយាយថា មនុស្សគ្រប់រូបដែលជិះលើយានជំនិះសាធារណៈ រួមទាំងអ្នកដំណើរ អ្នកបើកបរ និងបុគ្គលិកផ្សេងទៀតត្រូវតែពាក់ម៉ាស់ ហើយមនុស្ស​ដែលប៉ះពាល់​ផ្ទាល់​ជាមួយអ្នកដែលនៅ​ផ្សារ​ទំនើប និងផ្សារ​លក់ដុំ​នានា ក៏ត្រូវពាក់ម៉ាស់ដូចគ្នា។

បុគ្គលិកផ្នែកសេវាកម្ម អ្នកគ្រប់គ្រង និងកម្មករនៅកន្លែងបិទជិត ដូចជា បារ ឌីស្កូ ខារ៉ាអូខេ និងហាងម៉ាស្សា ហាងកែសម្ផស្ស កន្លែងហាត់ប្រាណ ភោជនីយដ្ឋាន រោងកុន មហោរស្រព សៀក និងកន្លែងហាត់ប្រាណ តម្រូវឱ្យពាក់ម៉ាស់គ្រប់ពេលវេលា។ ម៉ាស់ក៏ជាកាតព្វកិច្ចសម្រាប់បុគ្គលិកសេវាកម្ម អ្នកគ្រប់គ្រង និងអ្នកចូលរួមក្នុងកន្លែងវប្បធម៌ និងទេសចរណ៍ និងកន្លែងផ្សេងទៀតដែលមានព្រឹត្តិការណ៍មានមនុស្សច្រើនកុះករផងដែរ។

រដ្ឋបាលបានណែនាំដល់ស្ថាប័នពាក់ព័ន្ធ បន្តការប្រុងប្រយ័ត្ន និងតាមដានស្ថានភាពជំងឺរាតត្បាត ដើម្បីធ្វើផែនការទាន់ពេលវេលា និងសកម្ម រួមទាំងការចាក់វ៉ាក់សាំង ពង្រឹងការត្រួតពិនិត្យវិធានការសុវត្ថិភាពនៅតាមអាជីវកម្ម និងគ្រឹះស្ថានផ្សេងៗ សាលារៀន ព្រំដែន និងកន្លែងថែទាំសុខភាព។ ទីក្រុងហាណូយបានកត់ត្រាករណី COVID-19 ខ្ពស់បំផុតនៅក្នុងប្រទេសក្នុងរយៈពេល ៥ថ្ងៃចុងក្រោយគឺ ៦៩ ករណី ក្នុងមួយថ្ងៃជាមធ្យម។ មនុស្សសរុបចំនួន ៥៦៦ នាក់ ត្រូវបានបញ្ជូនទៅមន្ទីរពេទ្យដោយ ២៩ នាក់ កំពុងត្រូវការជំនួយអុកស៊ីសែន៕

អត្ថបទ៖ លីដា
ប្រភព៖ VNExpress