ប្រទេសថៃកាលពីថ្ងៃសុក្រ ទី២១ ខែមេសា ឆ្នាំ២០២៣ បានចេញការព្រមានពាក់ព័ន្ធនឹងសីតុណ្ហភាពក្តៅខ្លាំង ខណៈដែលតំបន់មួយចំនួនបានហក់ឡើងដល់ជាង ៥០ អង្សាសេ ស្របពេលដែលកាលពីចុងសប្តាហ៍មុន សីតុណ្ហភាពរបស់ប្រទេសនេះបានកើនឡើងដល់ ៤៥ អង្សាសេ ជាលើកដំបូងក្នុងប្រវត្តិសាស្ត្ររបស់ខ្លួន។ នាយកដ្ឋានឧតុនិយមបានព្រមានថា សន្ទស្សន៍កម្ដៅក្ដៅខ្លាំង នឹងឈានដល់កម្រិតគ្រោះថ្នាក់នៅក្នុងទីក្រុងបាងកក និងខេត្តចំនួន ៣ ផ្សេងទៀត នេះបើតាមការឱ្យដឹងពី The Nation Thailand។

តំបន់ដែលរងការព្រមានចំពោះសីតុណ្ហភាពក្តៅខ្លាំងមានដូចជា៖ ខេត្តពេជ្របូរណ៍ ៤៨.១ អង្សាសេ, ខេត្តមហាសារខាម ៤៤.៥ អង្សាសេ, ទីក្រុងបាងកក ៥៤ អង្សាសេ, ខេត្តឈុនបុរី ៥៤ អង្សាសេ និង ខេត្តភូកេត ៥៤ អង្សាសេ។

ជាមួយគ្នានេះ ប្រទេសថៃក៏បានបែងចែកកម្រិតគ្រោះថ្នាក់ដូចជា៖

• កម្រិតត្រូវតាមដាន (២៧-៣២ អង្សាសេ)៖ វាអាចនាំឱ្យមានការអស់កម្លាំង វិលមុខ ចង្អោរ ក្អួត ឈឺក្បាល និងឈឺសាច់ដុំ ដោយសារការប៉ះពាល់នឹងកម្ដៅ ឬសកម្មភាពរាងកាយក្នុងលក្ខខណ្ឌអាកាសធាតុក្តៅ។
• កម្រិតប្រុងប្រយ័ត្ន (៣២-៤១ អង្សាសេ)៖ អាចបណ្ដាលឱ្យរមួលសាច់ដុំ ហើយអាចជួបប្រទះនឹងការហត់នឿយ ប្រសិនបើប៉ះពាល់នឹងសីតុណ្ហភាពក្ដៅក្នុងរយៈពេលយូរ។
• កម្រិតព្រមាន (៤១-៥៤អង្សាសេ)៖ អាចធ្វើឱ្យរមួលសាច់ដុំជើង ដៃ ពោះ ឬរឹងស្មា, អារម្មណ៍ហត់នឿយពីកម្ដៅ និងអាចវិវត្តទៅជាជំងឺដាច់សរសៃឈាមខួរក្បាល ប្រសិនបើត្រូវកម្ដៅក្នុងរយៈពេលយូរ។
• គ្រោះថ្នាក់ខ្លាំង (៥៤ អង្សាសេ និងខ្ពស់ជាងនេះ)៖ អាចបណ្ដាលឱ្យទៅជាជំងឺដាច់សរសៃឈាមខួរក្បាល។

ដូច្នេះពលរដ្ឋត្រូវតាមដានរោគសញ្ញា ជាពិសេសចំពោះកុមារតូចៗ មនុស្សចាស់ និងអ្នកដែលមានជម្ងឺប្រចាំកាយ។ ពលរដ្ឋក៏ត្រូវបានណែនាំផងដែរ ឱ្យកាត់បន្ថយសកម្មភាពក្រៅ ពាក់មួក វ៉ែនតា និងសម្លៀកបំពាក់រលុង ហើយមានខ្យល់ចេញចូល។ ប្រសិនបើធ្វើការនៅខាងក្រៅ ចូរធ្វើការជាក្រុម៕

អត្ថបទ៖ លីដា
ប្រភព៖ The Nation Thailand