ស្រោមអនាម័យគឺជាផលិតផលមួយក្នុងចំណោមផលិតផលចំនួន ៥ ដែលប្រទេសថៃបាននាំចេញច្រើនជាងប្រទេសដទៃទៀតនៅក្នុងពិភពលោក នេះបើយោងតាមទិន្នន័យពីគេហទំព័រការយល់ដឹងអំពីពាណិជ្ជកម្មពិភពលោក kidka.com តាមរយៈសារព័ត៌មាន Prachachat។ ប្រធានការិយាល័យគោលនយោបាយ និងយុទ្ធសាស្ត្រពាណិជ្ជកម្ម នៃក្រសួងពាណិជ្ជកម្មថៃ លោក Poonping Naiyanapakorn បាននិយាយថា ប្រទេសថៃបាននាំចេញផលិតផលឈានមុខចំនួន ៥ ក្នុងឆ្នាំ២០២២ ដោយការទាញយកអត្ថប្រយោជន៍ពីវត្ថុធាតុដើមនៅក្នុងស្រុក ខណៈជាមូលដ្ឋានផលិតកម្មដ៏សំខាន់ក្នុងតំបន់។ ដូច្នេះហើយប្រទេសនានាជុំវិញពិភពលោក បានជឿជាក់យ៉ាងខ្លាំងលើផលិតផលរបស់ប្រទេសថៃ។

ក្នុងចំណោមផលិតផលទាំង ៥ ដែលប្រទេសថៃបាននាំចេញទៅកាន់ពិភពលោកមានដូចជា៖

១. ផ្លែទុរេន៖ ប្រទេសថៃរកបានប្រមាណ ៣.២១ ពាន់លានដុល្លារ ពីការនាំចេញស្ដេចផ្លែឈើមួយនេះ នៅក្នុងឆ្នាំ២០២២ ហើយអតិថិជនធំជាងគេរបស់ទុរេនថៃ គឺប្រទេសចិន ហុងកុង តៃវ៉ាន់។ ប្រទេសថៃកាន់កាប់ទីផ្សារទុរេនស្រស់របស់ពិភពលោក ៩៣% ខណៈវៀតណាម (៦%) និងម៉ាឡេស៊ី (០.៧%) ។

២. ដំឡូងមី៖ ការនាំចេញរបស់វាមាន​តម្លៃប្រមាណ ​១.៥២ ពាន់​លាន​ដុល្លារ​ ក្នុង​ឆ្នាំ​២០២២ ហើយ​ទីផ្សារ​ធំ​ជាងគេ​ គឺ​ប្រទេស​ចិន សហរដ្ឋអាមេរិក និង​វៀតណាម​។ ដំឡូងមីរបស់ថៃតំណាងឱ្យ ៤៦.៥% នៃទីផ្សារដំឡូងមីពិភពលោក បន្ទាប់មកកម្ពុជា (៣៤.១%) និងឡាវ (៩.១%)។

៣. ស្រោមអនាម័យ៖ ក្នុងឆ្នាំ២០២២ ប្រទេសថៃបាននាំចេញស្រោមអនាម័យដែលមានតម្លៃ ២.៧២ ពាន់លានដុល្លារ ជាមួយនឹងតម្រូវការច្រើនបំផុតមកពីប្រទេសចិន សហរដ្ឋអាមេរិក និងវៀតណាម។ ស្រោមអនាម័យថៃរួមចំណែក ៤៤% នៃស្រោមអនាម័យពិភពលោក បន្ទាប់មកស្រោមអនាម័យផលិតនៅប្រទេសចិន (១២.៨%) និងម៉ាឡេស៊ី (១០.៨%)។

៤. ម្នាស់កំប៉ុង៖ ប្រទេស​ថៃ​បាន​នាំ​ចេញ​ម្នាស់​កំប៉ុង​ក្នុង​តម្លៃ ​៤៦៩.៦៩​ លាន​ដុល្លារ​ នៅក្នុង​ឆ្នាំ​២០២២ ដោយ​ទីផ្សារ​ធំ​ជាងគេ​គឺ​សហរដ្ឋអាមេរិក រុ​ស្ស៊ី និង​អា​ល្លឺ​ម៉​ង់។ ម្នាស់កំប៉ុង​របស់​​ថៃ​តំណាង​ឱ្យ ៣៦.៤% នៃម្នាស់កំប៉ុង​របស់​ពិភពលោក តាម​ពីក្រោយ​ដោយ​​ឥណ្ឌូណេស៊ី (២៥.៧%) និង​ហ្វីលីពីន (១៨%)។

៥. ត្រីធូណាកំប៉ុង៖ កាល​ពី​ឆ្នាំ​មុន ថៃ​បាន​នាំ​ចេញ​ត្រីធូណា​កំប៉ុង​ដែល​មាន​តម្លៃ ២.២៨ ពាន់​លាន​ដុល្លារ​ ហើយ​អ្នក​ប្រើ​ប្រាស់​ច្រើន​ជាង​គេ​ គឺ​សហរដ្ឋ​អាមេរិក ជប៉ុន និង​អូស្ត្រាលី។ ប្រទេសថៃកាន់កាប់ ២៤.៨% នៅក្នុងទីផ្សារត្រីធូណាកំប៉ុងទូទាំងពិភពលោក បន្ទាប់មកអេក្វាឌ័រ (១៥.២%) និងអេស្ប៉ាញ (៩.៥%) ៕

អត្ថបទ៖ លីដា
ប្រភព៖ The Thaiger , Prachachat