លោក Volodymr Zelensky (ហ៊្សែលឡិនស្គី) បានឱ្យដឹងថា គាត់បាននិយាយទូរស័ព្ទយ៉ាងយូរ និងស៊ីជម្រៅ ជាមួយលោក Xi Jinping (ស៊ី ជីនពីង) ដែលជាទំនាក់ទំនងលើកដំបូងរបស់ពួកគេ ចាប់តាំងពីសង្រ្គាមរុស្ស៊ី-អ៊ុយក្រែនបានចាប់ផ្តើម។ លោកបាននិយាយនៅលើ Twitter ថា៖«ការសន្ទនាគ្នានេះ រួមជាមួយនឹងការតែងតាំងឯកអគ្គរដ្ឋទូតប្រចាំទីក្រុងប៉េកាំង នឹងផ្តល់កម្លាំងរុញច្រានដ៏ខ្លាំងក្លា ដល់ការអភិវឌ្ឍន៍ទំនាក់ទំនងទ្វេភាគីរបស់យើង»។ ប្រទេសចិនបានបញ្ជាក់ពីការសន្ទនាគ្នាតាមទូរស័ព្ទនេះ ដោយបន្ថែមថា ខ្លួនតែងតែឈរនៅខាងសន្តិភាព។

រហូត​មក​ដល់​ពេល​នេះ ទីក្រុង​ប៉េកាំង​បាន​ព្យាយាម​បង្ហាញ​ជំហរ​អព្យាក្រឹត​លើ​ការ​ឈ្លានពាន​របស់​រុស្ស៊ី។ ប៉ុន្តែខ្លួនមិនបានថ្កោលទោសការឈ្លានពាននេះដូចលោកខាងលិចទេ ខណៈកាលពីខែមុនប្រធានាធិបតី ស៊ី បានទៅបំពេញទស្សនកិច្ចផ្លូវរដ្ឋរយៈពេលពីរថ្ងៃទៅកាន់ប្រទេសរុស្ស៊ី។ គាត់បានហៅប្រធានាធិបតី វ្ល៉ាឌីមៀ ពូទីន ថាជាមិត្តសម្លាញ់របស់គាត់ និងបានស្នើផែនការសន្តិភាព ១២ ចំណុច ហើយបានទទូចថា ប្រទេសចិនឈរនៅខាងសន្តិភាព។ ទោះ​ជា​យ៉ាង​ណា លោក​មិន​បាន​ប្តេជ្ញា​ផ្តល់​អាវុធ​ដល់​រុស្ស៊ី​ទេ។

ក្នុងរយៈពេលប៉ុន្មានថ្ងៃនៃដំណើរទស្សនកិច្ចនោះដែរ ប្រធានាធិបតីលោក ហ៊្សែលឡិនស្គី ក៏បានអញ្ជើញមេដឹកនាំចិនទៅទស្សនកិច្ចនៅទីក្រុងគៀវ ដើម្បីពិភាក្សាគ្នា ដោយកត់សម្គាល់ថា ពួកគេធ្លាប់បានទាក់ទងគ្នាមុនពេលសង្រ្គាម ប៉ុន្តែមិនដែលបាននិយាយគ្នាសោះ ចាប់តាំងពីសង្គ្រាមបានចាប់ផ្តើមនៅក្នុងខែកុម្ភៈ ឆ្នាំ២០២២។ នៅក្នុងការសន្ទនាតាមទូរស័ព្ទកាលពីថ្ងៃពុធ ទូរទស្សន៍ CCTV របស់ប្រទេសចិន បានដកស្រង់សម្តីរបស់លោកប្រធានាធិបតី ស៊ី ដែលបាននិយាយថា ប្រទេសចិននឹង «បញ្ឆេះភ្លើង ឬបន្ថែមប្រេងទៅក្នុងភ្លើងលើភាគីណាទេ កុំថាតែការទាញយកប្រយោជន៍ពីវិបត្តិដើម្បីការចំណេញផ្ទាល់ខ្លួន»។ មានន័យថា លោកនឹងមិននៅខាងណា ឬអុចអាលឱ្យគេកាន់តែឈ្លោះគ្នាកាន់តែខ្លាំង ដើម្បីទាញយកប្រយោជន៍នោះទេ៕

អត្ថបទ៖ លីដា
ប្រភព៖ BBC