សេតវិមានបាននិយាយថា យោធារុស្សីបានបាត់បង់កម្លាំងដែលរួមមានការស្លាប់ និងរបួសចំនួន ១០០,០០០ នាក់ ក្នុងរយៈពេល ៥ ខែចុងក្រោយនេះ នៅក្នុងការបន្តការលុកលុយរបស់ខ្លួនលើប្រទេសអ៊ុយក្រែន ខណៈបានហៅ «ការវាយលុករដូវរងា» របស់លោក វ្ល៉ាឌីមៀ ពូទីន នៅឯតំបន់ Donbas គឺជាការបរាជ័យ។ តួ​លេខ​នេះ​ផ្អែក​លើ​ការ​ប៉ាន់​ស្មាន​របស់ចារកម្ម​អាមេរិក ដោយរួម​មាន​ចំនួនស្លាប់​ជាង​ ២០,០០០​នាក់ ហើយ ១០,០០០ នាក់ ក្នុងចំណោមពួកគេ គឺជាទាហាននៃក្រុមយោធា Wagner ឯកជន នេះបើយោងតាមអ្នកនាំពាក្យសន្តិសុខជាតិរបស់សេតវិមានលោក John Kirby ។

លោក Kirby បាននិយាយថា៖«ការប៉ុនប៉ងរបស់រុស្ស៊ីក្នុងការវាយលុករដូវរងារ នៅតំបន់ Donbas ភាគច្រើនតាមរយៈច្រកក្រុង Bakhmut បានបរាជ័យ» ដោយបន្ថែមថា ទោះបីជាទីក្រុងម៉ូស្គូបានឃើញការកើនឡើងមួយចំនួននៅក្នុងក្រុង Bakhmut ប៉ុន្តែពួកគេទទួលបានវា ដោយការបាត់បង់ទៅយ៉ាងអាក្រក់ដូចគ្នា។ ឧត្តមសេនីយ​កំពូល​អ៊ុយក្រែន​ម្នាក់​បាន​និយាយ​ថា នៅ​ជួរ​មុខ​ អង្គភាព​អ៊ុយក្រែន​បាន​បង្ខំ​ទាហាន​រុស្ស៊ី​ឱ្យ​ចាកចេញ​ពី​ទីតាំង​មួយ​ចំនួន​នៅ Bakhmut ចំពេល​មាន​ការ​ប្រយុទ្ធ​គ្នា​យ៉ាង​ខ្លាំង។ លោក​បាន​បន្ត​ថា កម្លាំង​ថ្មី​របស់​រុស្សី​កំពុង​ត្រូវ​បាន​ «បោះ​ចូល​ក្នុង​សមរភូមិ​ Bakhmut» បើ​ទោះ​បី​ទទួល​រង​ការ​ខាត​បង់​យ៉ាង​ខ្លាំង​ក៏​ដោយ៕

អត្ថបទ៖ លីដា
ប្រភព៖ Independent