សហរដ្ឋ​អាមេរិកបាន​និយាយ​ថា ខ្លួន​នឹង​បញ្ជូន​រ៉ុក្កែតបាញ់​តាម​អាកាស​ជា​លើក​ដំបូង​ទៅ​អ៊ុយក្រែន។ ការនាំចេញរ៉ុក្កែត Hydra-70 គឺជាផ្នែកមួយនៃជំនួយផ្នែកសន្តិសុខបន្ថែម ដែលមានតម្លៃរហូតដល់ ៣០០ លានដុល្លារ។ ក្រសួងការពារជាតិអាមេរិកបានប្រកាសកាលពីថ្ងៃពុធថា កញ្ចប់នេះក៏នឹងរួមបញ្ចូលផងដែរនូវគ្រាប់រំសេវបន្ថែម សម្រាប់ប្រព័ន្ធកាំភ្លើងធំចល័តទំនើបដែលផ្តល់ដោយសហរដ្ឋអាមេរិក ឬហៅថា HIMARS និងកាំភ្លើងធំ howitzer ជាច្រើនទៀត។

នាយកដ្ឋាននេះបាននិយាយថា សហរដ្ឋអាមេរិកបានផ្តល់ជំនួយយោធាដល់អ៊ុយក្រែនសរុបចំនួន ៣៥.៧ ពាន់លានដុល្លារ ចាប់តាំងពីការឈ្លានពានរបស់រុស្ស៊ី កាលពីខែកុម្ភៈឆ្នាំមុន។ នាយកដ្ឋានបាននិយាយនៅក្នុងសេចក្តីថ្លែងការណ៍ថា៖«សហរដ្ឋអាមេរិកនឹងបន្តធ្វើការជាមួយសម្ព័ន្ធមិត្ត និងដៃគូរបស់ខ្លួន ដើម្បីផ្តល់ឱ្យអ៊ុយក្រែននូវសមត្ថភាពដើម្បីបំពេញតម្រូវការសមរភូមិភ្លាមៗ និងតម្រូវការជំនួយសន្តិសុខរយៈពេលវែង»៕

អត្ថបទ៖ លីដា
ប្រភព៖ NHK