យោងតាមការចុះផ្សាយរបស់សារព័ត៌មាន BBC បានរាយការណ៍ថា តារាកំប្លែងម៉ាឡេស៊ី Nigel Ng ឬស្គាល់ជាទូទៅថា Uncle Roger ត្រូវបានហាមឃាត់ពីបណ្ដាញសង្គមយក្សចិន Weibo ដោយសារគាត់បានបំពានច្បាប់ និងបទប្បញ្ញត្តិពាក់ព័ន្ធនឹងប្រទេសចិន។ នៅក្នុងវីដេអូ​ឃ្លីបមួយ តារាកំប្លែងដ៏ល្បីរូបនេះបាននិយាយទៅកាន់អ្នកទស្សនាម្នាក់ ដែលមកពីទីក្រុងក្វាងចូវ ប្រទេសចិន ហើយពេលនោះផងដែរ គាត់បាននិយាយថា៖«ប្រទេសល្អ ប្រទេសល្អ យើងត្រូវតែនិយាយបែបនេះ»។

បន្ទាប់មកទៀត គាត់ក៏បានលេងសើចពាក់ព័ន្ធនឹងការលបស្ដាប់ ឬយកការណ៍ តាមរយៈស្មាតហ្វូនរបស់ទីក្រុងប៉េកាំង ដោយគាត់បាននិយាយថា៖«ពួកគេ [ចិន] កំពុងស្តាប់។ ទូរស័ព្ទរបស់យើងទាំងអស់គ្នា ជាប់ក្នុងប្រព័ន្ធនោះ។ ចូរចម្រើនលោកប្រធានាធិបតី ស៊ី ចូរចម្រើនលោកប្រធានាធិបតី ស៊ី»។ វាមិនមែនជាលើកទី១ ដែលគាត់បានប៉ះពាល់ដល់ប្រទេសចិននោះទេ ខណៈនៅក្នុងវីដេអូដដែលនោះ គាត់ក៏បានលេងសើចជាមួយនឹងកោះតែវ៉ាន់ផងដែរ។

រំលឹកដែរថា កាលពីសប្តាហ៍មុនតារាកំប្លែងចិន Li Haoshi ក៏ត្រូវបានចាប់ខ្លួន បន្ទាប់ពីគាត់បាននិយាយលេងសើចប្រៀបធៀបសត្វឆ្កែរបស់គាត់ ទៅនឹងពាក្យស្លោកដែលលោក ស៊ី ជីនពីង និយាយទៅកាន់យោធា។ ក្រុមហ៊ុនដែលបានជួលគាត់ត្រូវបានគេពិន័យជាប្រាក់ចំនួន ២.១ លានដុល្លារ។ ក្រោយមកលោក Li ក៏បានសុំទោសចំពោះការអត្ថាធិប្បាយរបស់គាត់ ប៉ុន្តែគាត់នៅតែប្រឈមមុខនឹងការជាប់ពន្ធនាគាររហូតដល់ ៣ ឆ្នាំ៕

អត្ថបទ៖ លីដា
ប្រភព៖ BBC