រដ្ឋបាល​របស់​ប្រធានាធិបតី​រុស្ស៊ី វ្ល៉ាឌីមៀ ពូទីន កំពុង​ពង្រឹង​ទំនាក់ទំនង​ជាមួយ​អតីត​សាធារណរដ្ឋ​សូវៀត និង​ចិន ​ចំពេល​មាន​ភាព​តានតឹង​កាន់តែខ្លាំង រវាង​រុស្ស៊ី និង​ប្រទេស​លោក​ខាង​លិច។ លោកពូទីន បានថ្លែងសុន្ទរកថា នៅឯវេទិកានៃសហភាពសេដ្ឋកិច្ចអឺរ៉ាស៊ី ដែលដឹកនាំដោយរុស្ស៊ីនៅទីក្រុងមូស្គូកាលពីថ្ងៃពុធ ដោយបាននិយាយថាថា អ្នកជំនាញបានព្យាករណ៍ថា សេដ្ឋកិច្ចរបស់រុស្ស៊ីនឹងធ្លាក់ចូលទៅក្នុងវិបត្តិសេដ្ឋកិច្ចយ៉ាងជ្រៅ។ ប៉ុន្តែ​គាត់​បាន​និយាយ​ថា​៖«​មិន​មាន​អ្វី​កើតឡើង​ ឬ​កំពុង​កើត​ឡើង​នៅ​ពេល​នេះ​ទេ ហើយ​ច្បាស់​ណាស់​ថា​នឹង​មិន​អាចកើតឡើងបាន​»​។

ប្រធានាធិបតីបេឡារុស្ស Alexander Lukashenko និងមេដឹកនាំនៃប្រទេសចំនួន ៤ ផ្សេងទៀត ស្ថិតក្នុងចំណោមអ្នកចូលរួម។ ជាមួយគ្នានេះ នាយករដ្ឋមន្ត្រីរុស្ស៊ី លោក Mikhail Mishustin ក៏បានជួបពិភាក្សាជាមួយប្រធានាធិបតីចិន Xi Jinping នៅទីក្រុងប៉េកាំង កាលពីថ្ងៃពុធ។ លោក Mishustin បាននិយាយថា រុស្ស៊ី និងចិន កំពុងឈររួមគ្នាប្រឆាំងនឹងការប៉ុនប៉ងរបស់បណ្តាប្រទេសលោកខាងលិច ក្នុងការប្រើប្រាស់នូវអ្វីដែលលោកហៅថាទណ្ឌកម្មខុសច្បាប់ ដើម្បីរក្សាឥទ្ធិពលរបស់ពួកគេលើពិភពលោក។

ប្រទេសលោកខាងលិចបាននិងកំពុងបង្ហាញថា ពួកគេកំពុងរួមដៃគ្នា។ ជាក់ស្ដែង នៅឯកិច្ចប្រជុំកំពូលនៃក្រុមទាំង ៧ នៅទីក្រុងហ៊ីរ៉ូស៊ីម៉ា ពួកគេបានប្រកាសថា ពួកគេនឹងផ្តល់ការគាំទ្រផ្នែកយោធាបន្ថែមទៀតដល់អ៊ុយក្រែន៕

អត្ថបទ៖ លីដា
ប្រភព៖ NHK