ប្រធានសមាគមកីឡាបាល់ទាត់ឥណ្ឌូណេស៊ី បានបញ្ជាក់យ៉ាងច្បាស់ថា លោកនឹងមិនធ្វើការដាក់ពិន័យលើក្រុមកីឡាករនោះទេ ព្រោះវាមិនចាំបាច់ត្រូវមានការអន្តរាគមន៍ នេះបើតាមការចុះផ្សាយរបស់សារព័ត៌មាន  Thairath ថ្ងៃព្រហស្បតិ៍ ទី២៥ ខែឧសភា ឆ្នាំ២០២៣។ រំលឹកផងដែរថា ភាពចលាចលយ៉ាងធំបានផ្ទុះឡើង នៅក្នុងជំនួបការប្រកួតបាល់ទាត់អាយុក្រោម ២២ឆ្នាំ រវាងជម្រើសជាតិឥណ្ឌូណេស៊ី និងថៃ ក្នុងព្រឹត្តិការណ៍ស៊ីហ្គេមលើកទី៣២ កន្លងទៅថ្មីៗនេះ។ ភាគីថៃបានចេញសារបង្ហាញពីការខកចិត្ត ហើយបានបើកការស៊ើបអង្កេត និងបានព្យួរការងារបុគ្គលិក និងកីឡាករដែលពាក់ព័ន្ធផងដែរ។

យ៉ាងណាមិញថ្មីៗ​នេះ លោក Eric Thohir ប្រធាន​សមាគម​បាល់ទាត់​ឥណ្ឌូណេស៊ី​បញ្ជាក់​ថា នឹង​មិន​មាន​ការ​ពិន័យ​ដល់​កីឡាករ និង​បុគ្គលិកណាម្នាក់​ឡើយ។ លោកថា៖«ខ្ញុំបានឃើញការដាក់ទណ្ឌកម្មរបស់សមាគមបាល់ទាត់ថៃ វាជាបញ្ហារបស់ប្រទេសនោះ។ យើង (ឥណ្ឌូនេស៊ី) នឹងមិនពិន័យអ្វីទាំងអស់ យើងមិនចាំបាច់ធ្វើអន្តរាគមន៍ទេ ព្រោះនេះគឺជាមេរៀនដែលកីឡាករបាល់ទាត់បានទទួលរួចហើយ។ វានឹងត្រូវបានលើកឡើង សម្រាប់​ការ​កែប្រែ​បន្ថែម​ទៀត។​ យើង​នៅ​តែ​មាន​ទំនាក់​ទំនង​ល្អ​ជាមួយ​ក្រុម​ក្នុង​តំបន់​អាស៊ាន។​ មិន​ថា​ថៃ​ ឬ​វៀតណាម​ទេ»៕

អត្ថបទ៖ លីដា
ប្រភព៖ Thairath