តុលាការរបស់ប្រទេស​បារាំង​នឹងធ្វើការ​កាត់ទោស​ជនសង្ស័យ ១៩នាក់ ​ជុំវិញ​ផែនការ​រត់ពន្ធ​មនុស្ស​ ដែល​នាំ​ឱ្យ​មាន​ការ​ស្លាប់យ៉ាងអាណោច​អាធ័ម ចំពោះជនជាតិវៀតណាមចំនួន ៣៩ នាក់​ កាលពី​ឆ្នាំ២០១៩។ ជនជាតិវៀតណាមចំណាកស្រុកទាំងអស់នោះ ​បាន​ស្លាប់​ដោយ​សារថប់​ដង្ហើម ស្របពេលកំពុង​បញ្ជូនទៅ​កាន់ប្រទេស​អង់គ្លេស​ នៅក្នុងឡានដឹកទំនិញខ្នាតធំមួយគ្រឿង។ ពីរនាក់ក្នុងចំណោមជនរងគ្រោះ​ដែល​បាន​ស្លាប់​ក្នុង​សោកនាដកម្ម​នោះ​ មាន​អាយុត្រឹមតែ ១៥ឆ្នាំ​ប៉ុនណោះ​។

សាកសពរបស់ជនរងគ្រោះត្រូវបានគេរកឃើញនៅកំពង់ផែមួយ នៅជិតទីក្រុងឡុងដ៍ កាលពីខែតុលា ឆ្នាំ២០១៩។ ប្រភពបាននិយាយថា កាលពីថ្ងៃអង្គារប៉ុន្មានថ្ងៃមុននេះ ចៅក្រមបារាំងដែលស៊ើបអង្កេតលើឧប្បត្តិហេតុនេះ បានបញ្ជាឱ្យកាត់ទោសជនជាប់ចោទចំនួន ១៩នាក់ ដែលមានអាយុចន្លោះពី ២១ ទៅ ៥៨ឆ្នាំ ជុំវិញសោកនាដកម្មនេះ។ ប្រភពបានបន្ថែមទៀតថា ការស៊ើបអង្កេតជាសកលបង្ហាញថា ជនសង្ស័យភាគច្រើនជាជនជាតិវៀតណាម បារាំង ចិន អាល់ហ្សេរី និងម៉ារ៉ុក ដែលធ្វើការជាបណ្តាញដ៏ធំមួយ រត់ពន្ធមនុស្សពីប្រទេសវៀតណាមទៅកាន់អឺរ៉ុប។

ជនសង្ស័យទាំងអស់នោះ នឹងត្រូវកាត់ទោសពីបទសម្របសម្រួលការចូលខុសច្បាប់ឱ្យជនចំណាកស្រុក រៀបចំការស្នាក់នៅលើទឹកដីបារាំងដោយខុសច្បាប់ និងសហការគ្នាក្នុងគោលបំណងប្រព្រឹត្តបទឧក្រិដ្ឋ ដែលអាចឱ្យពួកគេជាប់ពន្ធនាគាររហូតដល់ ១០ឆ្នាំ។ ៤នាក់ ក្នុងចំណោមពួកគេ ក៏នឹងត្រូវកាត់ទោសពីបទឃាតកម្ម ចំពោះការខកខានក្នុងការធានានូវកាតព្វកិច្ចថែទាំក្នុងអំឡុងពេលប្រតិបត្តិការរត់ពន្ធ ដែលអាចនាំឱ្យជាប់ពន្ធនាគាររយៈពេល ៣ឆ្នាំ។

វាមិនមែនជាលើកទី១ ទេ ដែលជនសង្ស័យពាក់ព័ន្ធនឹងករណីស្លាប់របស់ជនជាតិវៀតណាមទាំង ៣៩ នាក់ ត្រូវបានគេបើកសវនាការកាត់ទោស។ ពួកគេត្រូវបានតុលាការមកពីប្រទេសនៅអឺរ៉ុបផ្សេងៗគ្នា បានធ្វើការកាត់ទោស ហើយទំហំនៃការដាក់ពន្ធនាគារក៏មានភាពខុសៗគ្នាផងដែរ៕

អត្ថបទ៖ លីដា
ប្រភព៖ បាងកកប៉ុស្ដិ៍