នាយកដ្ឋានដឹកជញ្ជូនផ្លូវគោកថៃ បានផាកពិន័យអ្នកបើកតាក់ស៊ីម្នាក់ចំនួន ២,០០០ បាត (ជិត៦០ដុល្លារ) និងបានព្យួរប័ណ្ណបើកបររយៈពេល ៩០ថ្ងៃ ដោយសារគាត់បានគិតលុយហួសហេតុពេក ពីអ្នកដំណើរជនជាតិតៃវ៉ាន់។ អ្នកបើកតាក់ស៊ីឈ្នោះ Kittipong ​ត្រូវ​បាន​កោះហៅ​ឱ្យ​ទៅ​ជួប​មន្ត្រី​អធិការកិច្ច​ដឹកជញ្ជូន​របស់​នាយកដ្ឋាន។ អ្នកបើកបរ​រូបនោះបាន​ធ្វើការសារភាពកំហុសរបស់ខ្លួន និងរៀបរាប់ថា គាត់បានដឹកអ្នកដំណើរតៃវ៉ាន់ម្នាក់ពី Impact Arena Muang Thong Thani ក្នុងខេត្ត Nonthaburi ដើម្បីធ្វើដំណើរទៅកាន់ស្ថានីយ៍រថភ្លើង Bangpho MRT ។

ចម្ងាយដែលបានជិះគឺ ១៣ គីឡូម៉ែត្រ ហើយតម្លៃធ្វើដំណើរគឺអស់ប្រហែល ១៦០ បាតប៉ុណ្ណោះ ប៉ុន្តែលោក Kittipong មិនព្រមប្រើម៉ែត្រវាស់គីឡូទេ ហើយទាមទារថ្លៃជិះ ២,០០០ បាត។ អ្នកដំណើរបានកត់ត្រាការធ្វើដំណើរ ការសន្ទនា ឯកសណ្ឋានរបស់គាត់ ហើយបានបង្ហោះវានៅលើបណ្ដាញ TikTok។ វីដេអូនោះ ក៏បានទាក់ទាញមតិអវិជ្ជមានពីអ្នកលេង TikTok ដោយពួកគេបានរិះគន់អ្នកបើកបរថា គិតលុយលើសគីឡូផ្លូវ និងថែមទាំងមិនពាក់ឯកសណ្ឋានអ្នកបើកតាក់ស៊ី។ ប្រសិន​បើ​គាត់​ប្រព្រឹត្ត​ល្មើស​ម្តង​ទៀត ប័ណ្ណ​បើកបរ​របស់​គាត់​នឹង​ត្រូវ​ដក​ហូត។ នាយកដ្ឋានជំរុញឱ្យសាធារណជន ដែលបានឃើញបទល្មើសដែលប្រព្រឹត្តដោយអ្នកបើកតាក់ស៊ី ត្រូវដាក់ពាក្យបណ្ដឹង ដោយការទូរស័ព្ទទៅលេខ ១៥៨៤ និងកំណត់អត្តសញ្ញាណយានយន្តតាមស្លាកលេខតាក់ស៊ី៕

អត្ថបទ៖ លីដា
ប្រភព៖ ThaiPBSWorld