កូរ៉េខាងត្បូងបានសាកល្បងដោយជោគជ័យនូវប្រព័ន្ធប្រឆាំងមីស៊ីលផលិតក្នុងស្រុក ដែលមានសមត្ថភាពស្ទាក់ចាប់មីស៊ីលផ្លោងក្នុងរយៈកម្ពស់ខ្ពស់ ចំពេលមានការគំរាមកំហែងផ្នែកសន្តិសុខជាបន្តបន្ទាប់ពីកូរ៉េខាងជើង។ ទីភ្នាក់ងាររដ្ឋសម្រាប់ការអភិវឌ្ឍន៍ការពារជាតិ (ADD) បាននិយាយនៅថ្ងៃព្រហស្បតិ៍ថា ការបាញ់សាកល្បងជាមួយនឹងមីស៊ីលរយៈចម្ងាយឆ្ងាយពីផ្ទៃដីទៅអាកាស (L-SAM) បានធ្វើឡើងនៅទីតាំងសាកល្បង Anheung ក្នុងទីក្រុង Taean ខេត្ត Chungcheong ភាគខាងត្បូងកាលពីថ្ងៃអង្គារ។

ទីភ្នាក់ងារក៏បានបង្ហាញពីដំណើរការសាកល្បងទាំងមូល រួមទាំងការតាមដានមីស៊ីល និងការស្ទាក់ចាប់ចំគោលដៅ នៅក្នុងការសាកល្បងជោគជ័យលើកទី៣ ក្នុងចំណោមការសាកល្បងទាំង ៤ តាំងពីខែវិច្ឆិកាឆ្នាំមុន។

ធាតុសំខាន់មួយរបស់ប្រព័ន្ធ Korea Air and Missile Defense (KAMD) គឺការបំពាក់ឧបករណ៍ស្វែងរកអ៊ីនហ្វ្រារ៉េដ ដែលមានសមត្ថភាពបាញ់ទម្លាក់មីស៊ីលផ្លោងក្នុងរយៈកម្ពស់ ៥០ ដល់ ៦០ គីឡូម៉ែត្រ។ KAMD ក៏មានមីស៊ីល Patriot Advanced Capability-3 របស់សហរដ្ឋអាមេរិក និងមីស៊ីលរយៈចម្ងាយមធ្យម Cheongung-2 របស់កូរ៉េខាងត្បូង សម្រាប់ការស្ទាក់ចាប់នៅរយៈកម្ពស់ ៤០ គីឡូម៉ែត្រ ឬទាបជាងនេះ។ យោធាគ្រោងនឹងបញ្ចប់ការអភិវឌ្ឍន៍ L-SAM នៅឆ្នាំក្រោយ មុនពេលចាប់ផ្តើមផលិតកម្មទ្រង់ទ្រាយធំនៅឆ្នាំ២០២៥ និងដាក់ពង្រាយប្រព័ន្ធស្ទាក់ចាប់នៅមុនឆ្នាំ២០៣០៕

អត្ថបទ៖ លីដា
ប្រភព៖ KBS