អ៉ីតាលីនឹងពិន័យប្រាក់ជាង៦០០ដុល្លារអាមេរិកទៅនរណា ដែលនាំសំរាមប្រភេទនេះចូលកោះ Capri ដ៏ល្បីល្បាញរបស់គេ

អ៉ីតាលី៖ អ្នកទេសចរដែលមកទស្សនានៅលើកោះ Capri នឹងត្រូវប្រឈមនឹងការផាកពិន័យរហូតដល់ ៥០០ផោន (៦៥៤ដុល្លារអាមេរិក) ប្រសិនបើពួកគេនាំយកនូវថង់ប្លាស្ទិច ចានជ័រ ឬកាំបិតជ័រ… តាមរយៈច្បាប់ថ្មីរបស់ប្រទេស។ ការហាមប្រាមដែលបានចាប់ផ្តើមកាលពីដើមខែនេះ គឺក្នុងគោលបំណងដើម្បីការពារបរិស្ថានឆ្នេរសមុទ្រ ដែលនៅជុំវិញទីក្រុង Naples របស់អ៊ីតាលី ខណៈដែលភ្ញៀវទេសចរមានការកើនឡើងហួសហេតុ។

អភិបាលក្រុងលោក Giovanni De Martino និងប្រធានសមាគមបរិស្ថានវិទ្យា Legambiente របស់អ៊ីតាលីក៏បានឯកភាពគ្នានឹងការសម្រេចចិត្តមួយនេះផងដែរ។ លោក De Martino បានប្រាប់កាសែត The Times ថា៖ «វាជាការផ្លាស់ប្តូរដ៏ធំមួយ ប៉ុន្តែប្រសិនបើយើងជួយការពារបរិស្ថានខ្ញុំគិតថា នឹងគ្មាននរណាម្នាក់ជំទាស់នោះទេ»។ ហើយសកម្មជនបរិស្ថានលោក Nabil Pulita បានបន្ថែមថា៖ «សំរាមគឺជាឃាតករពិតប្រាកដនៃសមុទ្ររបស់យើង»៕

អត្ថបទ៖ លីដា
ប្រភព៖ Daily Mail