ទីក្រុងបាងកក គ្រងតំណែងចំណាត់ថ្នាក់លេខ១ បួនឆ្នាំជាប់គ្នា ជាទីក្រុងដែលទទួលបានភ្ញៀវទេសចរណ៍ច្រើនបំផុតលើពិភពលោក
- September 5, 2019
ចាប់តាំងពីឆ្នាំ២០០៩មក កំណើនភ្ញៀវទេសចរណ៍ដែលធ្វើដំណើរកម្សាន្តក្រៅប្រទេសជុំវិញពិភពលោកគឺហាក់មានការកើនឡើងគួរជាទីកត់សម្គាល់ ដោយគិតមកទល់ពេលបច្ចុប្បន្ននេះគឺមានការកើនឡើងដល់ទៅ ៧៦% ទូទាំងពិភពលោក។ ថ្មីៗយោងតាមរបាយការណ៍របស់ Mastercard’s Global Destination Cities Index បានឲ្យដឹងថាទីក្រុងបាងកក ប្រទេសថៃបានផ្តួល ទីក្រុងល្បីៗឈ្មោះរបស់ពិភពលោកដូចជា ប៉ារីស ទីក្រុងឡុងដ៍ និងឌូបៃ ដោយឈរនៅលំដាប់លេខរៀងទី១ រយៈពេល៤ឆ្នាំជាប់គ្នា សម្រាប់តំណែងទីក្រុងដែលទទួលបានភ្ញៀវធ្វើដំណើរកម្សាន្ត និងស្នាក់នៅលើសពីមួយយប់ច្រើនបំផុតក្នុងពិភពលោក។
យោងតាមរបាយការណ៍ទេសចរណ៍ពិភពលោកប្រចាំឆ្នាំ២០១៨ បានឲ្យដឹងថាទីក្រុងបាងកក ប្រទេសថៃ គឺទទួលបានភ្ញៀវទេសចរណ៍ ដល់ទៅចំនួនជាង ២២.៧៨ លាននាក់ ដោយគិតជាមធ្យមភ្ញៀវទេសចរណ៍ទាំងនោះចាយអស់ចំនួន ១៨៤ដុល្លារ ក្នុងរយៈពេលមួយថ្ងៃ។ ការកើនឡើងនៃចំនួនភ្ញៀវទេសចរណ៍នេះបានធ្វើឲ្យទីក្រុងបាងកក អាចដណ្តើមយកជ័យលាភីលេខ១ ពីប្រទេសប៉ែកខាងអឺរ៉ុបដូចជា ក្រុងប៉ារីស និង ទីក្រុងឡុងដ៍ ដែលទទួលបានភ្ញៀវទេចរណ៍ជាង ១៩ លាននាក់តែប៉ុណ្ណោះ។ ក្នុងឆ្នាំ២០១៩នេះ ប្រទេសថៃ ហាក់នៅតែជឿជាក់ថាក្រុងបាងកក នឹងនៅតែអាចឈរនៅក្នុងលំដាប់លេខរៀងទី១របស់ពិភពលោក ជាប់ឈ្មោះជាទីក្រុងដែលមានភ្ញៀវកម្សាន្តច្រើនបំផុត ព្រោះតែរាជរដ្ឋាភិបាលខ្លួនបានរៀបចំកម្មវិធីកម្សាន្តជាច្រើនដើម្បីត្រៀមទុកទទួលភ្ញៀវទេសចរណ៍ជាពិសេសក្នុងរដូវកាលពិធីបុណ្យណូអែល និងឆ្លងឆ្នាំថ្មី សម្រាប់ចុងឆ្នាំនេះ។
របាយការណ៍ទេសចរណ៍ថៃបូកសរុបត្រឹមខែសីហា ២០១៩ កន្លងទៅនេះ ភ្ញៀវទេសចរណ៍ដែលមកទស្សនាប្រទេសថៃគឺមានការកើនឡើងចំនួន ៣.៣៤% បើធៀបទៅនឹងឆ្នាំមុន ដោយភាគច្រើនកំណើននៃភ្ញៀវទេសចរណ៍គឺជាភ្ញៀវជនជាតិចិន។ ខាងក្រោមនេះគឺជាទីក្រុងទាំង១០របស់ពិភពលោកដែលមានភ្ញៀវទេសចរណ៍ធ្វើដំណើរកម្សាន្តច្រើនបំផុតក្នុងឆ្នាំ២០១៨៖
១. ក្រុងបាងកក ឬ ក្រុងថេប ប្រទេសថៃ ២២.៧៨ លាននាក់
២. ប៉ារីស ប្រទេសបារាំង ១៩.១០ លាននាក់
៣. ទីក្រុងឡុងដ៍ ចក្រភពអង់គ្លេស ១៩.០៩ លាននាក់
៤. ក្រុងឌូបៃ អារ៉ាប់រួម ១៥.៩៣ លាននាក់
៥. សឹង្ហបុរី ១៤.៦៧ លាននាក់
៦. កូឡាឡាំពួរ ប្រទេសម៉ាឡេស៊ី ១៣.៧៩ លាននាក់
៧. ទីក្រុងញូវយ៉ក សហរដ្ឋអាមេរិក ១៣.៦០ លាននាក់
៨. ទីក្រុងអ៊ីស្តង់ប៊ុល ប្រទេសទួរគី ១៣.៤០ លាននាក់
៩. តូក្យូ ប្រទេសជប៉ុន ១២.៩៣ លាននាក់
១០. ទីក្រុងអាន់តាលីយ៉ា ប្រទេសទួរគី ១២.៤១ លាននាក់៕
- Share This Post: