ប្លែកហ្មង! Bottega Veneta បញ្ចេញកាតាឡុកស្បែកជើងថ្មី ដែលច្នៃយកម៉ូតតាមមីកញ្ចប់

កាតាឡុកសម្រាប់រដូវស្លឹកឈើជ្រុះឆ្នាំ២០២០ របស់ Bottega Veneta បានចេញផ្សាយហើយ ដែលវាកំពុងតែទទួលបានការចាប់អារម្មណ៍យ៉ាងខ្លាំង មានទាំងការសរសើរ និងការចំអក ដោយសារតែមួយក្នុងចំណោមរូបភាពកាតាឡុកទាំងនោះ វាដូចទៅនឹងមីជប៉ុន (Ramen) ខ្លាំងពេក។ វាជាគំនិតរចនាមួយដែលអាចនិយាយបានថាច្នៃប្រតិដ្ឋ ដោយសារថាកន្លងមកមី គឺមានប្រជាប្រិយភាពខ្លាំងណាស់។ ពិសេសមួយទៀតគឺថា មីគឺជាអាហារដោះទាល់មួយ សម្រាប់សិស្សនិស្សិតដែលដាច់លុយចាយឱ្យដល់ចុងខែ។

ជាក់ស្ដែងស្បែកជើងកែងនេះទទួលបានការចាប់អារម្មណ៍យ៉ាងខ្លាំងតាមប្រព័ន្ធអ៊ីនធឺណេត បន្ទាប់ពីគណនី Instagram ឈ្មោះថា Diet Prada បានចែករំលែកការប្រៀបធៀបស្បែកជើង ទៅនឹងមីជប៉ុននេះ ហើយវាទទួលបានការចុច Like ដល់ទៅជាង ៨០,០០០ឯណោះ។ នៅក្រោមការបង្ហោះក៏មានអ្នកឱ្យមតិមួយចំនួននិយាយថា វាមិនសមរម្យព្រោះថាវាជាអាហារប្រពៃណី និងមានអ្នកខ្លះទៀតយល់ថា គួរឱ្យចាប់អារម្មណ៍ ហើយក៏មានខ្លះទៀតចំអកថា ស្បែកជើងនេះគួរតែមានរសជាតិសាច់មាន់ទើបពួកគេនឹងទិញ ល ។ ប៉ុន្តែយ៉ាងណាក៏ដោយក្រុមហ៊ុន Bottega Veneta មិនទាន់បានប្រកាសពីតម្លៃស្បែកជើង ឬពេលណាដែលពួកគេចេញលក់ជាផ្លូវការនោះទេ។

អត្ថបទ៖ លីដា