ប្រជាជនជាង ៣០០,០០០គ្រួសារ នៅប្រទេសម៉ាឡេស៊ីកំពុងខ្វះខាតទឹកប្រើប្រាស់ ដោយសាររោងចក្រផលិតទឹកស្អាតរបស់ពួកគេត្រូវបានបំពុល

ម៉ាឡេស៊ី៖ ថ្មីៗនេះរោងចក្រផលិតទឹកស្អាត Sungai Semenyih និង Bukit Tampoi ត្រូវបានបិទទ្វារ ដោយសារតែរោងចក្រទាំង២ ត្រូវបានបំពុលដោយសារធាតុពុលម៉្យាងដែលមានក្លិនស្អុយ ហើយមកទល់ពេលនេះវានៅតែកំពុងបិទទ្វារនៅឡើយទេ។ បើយោងតាមអ្នកត្រួតពិនិត្យគុណភាពទឹកក្រុមហ៊ុន Pengurusan Air Selangor បាននិយាយថា ការបំពុលទឹករបស់រោងចក្រទាំង២ បានឈានដល់ក្នុងកម្រិត ២តោន នៅថ្ងៃនេះ ទោះបីជាមានកិច្ចខិតខំប្រឹងប្រែងស្តារវាឡើងវិញចាប់តាំងពីថ្ងៃសៅរ៍ក៏ដោយ។ ការបំពុលទឹកនេះកំពុងតែធ្វើឱ្យរំខានដល់គ្រួសារជាង ៣០០,០០០ នៅក្នុងរដ្ឋ Selangor ដែលធ្វើឱ្យអាជ្ញាធរត្រូវចាត់វិធាការផ្ដល់ទឹកជាបន្ទាន់។

កាលពីថ្ងៃសៅរ៍សប្តាហ៍មុនមានសេចក្តីរាយការណ៍ថា រោងចក្រផលិតទឹកទាំង ២ ត្រូវបង្ខំចិត្តបិទទ្វារ ដោយសារការបំពុលមានក្លិនស្អុយ ដែលបង្កឡើងដោយមនុស្សដែលមិនទទួលខុសត្រូវ ដោយពួកគេបានបោះចោលកាកសំណល់ខុសច្បាប់ទៅក្នុងប្រភពទឹករបស់រោងចក្រ Sungai Semenyih ។ នេះមិនមែនជាលើកទី១ទេ ដែលហេតុការណ៍បំពុលទឹកបានកើតឡើងនៅក្នុងរដ្ឋក្នុងឆ្នាំនេះ។ សូម្បីតែកាលពីខែកក្កដា អ្នកប្រើប្រាស់ប្រហែល ១លាននាក់ នៅក្នុងតំបន់ចំនួន ១,១៣៣ នៅ Klang Valley ក៏ត្រូវបានរងគ្រោះដោយការរំខានដល់ការផ្គត់ផ្គង់ទឹក ដោយសារតែការបំពុលប្រភពទឹកមិនទាន់ចម្រោះនៅ Sungai Selangor ផងដែរ៕

អត្ថបទ៖ លីដា